(E plotësuar 13:49) - Ministri i jashtëm grek, Nikos Dendias, ka kërkuar nga palët e përfshira në dialogun Kosovë – Serbi, që të intensifikojnë përpjekjet për arritjen e një marrëveshje të qëndrueshme.
Në një konferencë për media, pas takimit që pati me ministren e jashtme të Kosovës, Donika Gërvalla – Schwarz, Dendias tha se një marrëveshje mes Prishtinës dhe Beogradit do të krijonte stabilitet në Ballkan.
Dendias: E përkrahim nisjen e dialogut mes Prishtinës e Beogradit
“Ne e përkrahim plotësisht nisjen e dialogut mes Prishtinës dhe Beogradit. Po e shfrytëzoj prezencën time sot për t’u kërkuar të gjitha palëve që të intensifikojnë përpjekjet për një marrëveshje të qëndrueshme ligjore. Një marrëveshje, e cila do të stabilizonte tërë rajonin dhe do ta sillte atë më afër familjes evropiane. Jam në kontakt të vazhdueshëm me mikun tim, përfaqësuesin special të BE-së për dialogun, Miroslav Lajçak dhe Greqia në mënyrë aktive mbështet këtë nismë”, tha ai.
Në anën tjetër, ministrja e Jashtme e Kosovës, Donika Gërvalla – Schwarz, tha se njohja dhe respektimi i Pavarësisë së Kosovës nga të gjithë anëtarët e BE-së është domosdoshmëri për stabilitet të qëndrueshëm në Ballkan.
Gërvalla – Schwarz: Respektimi i pavarësisë së Kosovës krijon stabilitet në Ballkan
“Njohjen dhe respektimin e pavarësisë sonë nga të gjithë anëtarët e BE-së, përfshirë Greqinë, e konsiderojmë si një kontribut thelbësor për stabilitetin e qëndrueshëm në Ballkan. Pavarësia e Republikës së Kosovës është një fakt i patjetërsueshëm dhe sa më parë që pranohet një fakt i tillë, aq më shpejtë sigurohet një perspektivë e qëndrueshme për rajonin, por edhe Serbinë. Por, duke pasur parasysh faktin se Greqia Pavarësinë e Kosovës e sheh ende nga një këndvështrim tjetër, ne riafirmojmë se me Greqinë dhe me partnerë të tjerë të BE-së dhe jashtë saj do ta vazhdojmë intensivisht dialogun edhe rreth kësaj çështje. Shpresojmë sigurisht që argumentet tona në të ardhme të afërt të bindin partnerët tanë dhe të kalojmë nga kjo fazë pasigurie për rajonin në një fazë të sigurisë dhe parashikueshmërisë”, deklaroi ajo.
Tutje, Gërvalla bëri të ditur se me homologun grek po ashtu janë pajtuar që të avancohet statusi i Zyrës së Kosovës në Athinë, me qëllim të thellimit të bashkëpunimit mes dy vendeve.
Gërvalla - Schwarz: U pajtuam të avancojmë statusin e Zyrës së Kosovës në Athinë
“Republika e Kosovës dhe Republika e Greqisë janë pajtuar që si një hap i mëtejmë drejt një shkëmbimi të ngushtë dhe të dendur të ngrihet statusi i Zyrës së Athinës në Prishtinë nga një zyre e thjeshtë ekonomike në një zyre të ashtuquajtur interesi me qasje tashmë jo vetëm në çështje ekonomike, por edhe në fusha tjera duke përfshirë ato politike”, shtoi ajo.
Në konferencën e sotme për media, diplomati grek Dendias ripërsëriti edhe përkrahjen që ky shtet po i jep përpjekjeve të Kosovës për liberalizim të vizave.
Dendias: E përkrahim liberalizimin e vizave për Kosovën
“Ne besojmë se Ballkani Perëndimor i takon Evropës dhe duhet të përbëjë pjesë integrale të Bashkimit Evropian. Në këtë stad, ne kemi qenë gjithmonë në përkrahje të liberalizimit të vizave për kosovarët, sepse keni përmbushur standardet e kërkuara në fusha të ndryshme. E kemi shprehur këtë qëndrimin në Këshillin e Ministrave dhe do të vazhdojmë t’ju përkrahim”, tha ai.
Për liberalizimin e vizave foli edhe Gërvalla, e cila shprehu mirënjohjen e saj për rolin e Greqisë në këtë proces. Ajo, po ashtu tregoi se do të ketë intensifikim të bashkëpunimit ekonomik mes dy vendeve.
Gërvalla - Schwarz: Bashkëpunimi ekonomik, shtylla kryesore e marrëdhënieve mes dy vendeve
“Kolegun grek Dendias e sigurova se bashkëpunimin ekonomik mes Kosovës dhe Greqisë e shohim si një prej shtyllave kryesore të bashkëpunimit të ndërsjellë mes dy vendeve tona. Po ashtu, falënderova ministrin e jashtëm për mbështetjen që Greqia ka dhënë në procesin e liberalizimit të vizave, shoqëruar me lutjen për intensifikimin e përpjekjeve të përbashkëta për përfundimin e këtij procesi, i cili qytetarët e Kosovës po i mban të izoluar padrejtësisht”, deklaroi tutje Gërvalla – Schwarz.
Krejt në fund të konferencës së sotme, diplomati grek Dendias theksoi se Greqia do të vazhdojë të mbështesë misionin paqeruajtës të NATO-së në Kosovë, KFOR.
Dendias, përveç Gërvallës, po zhvillon takime edhe me liderë të tjerë institucional në Kosovë, nisur nga presidentja Vjosa Osmani, kryeministri Albin Kurti dhe kryeparlamentari Glauk Konjufca.
Kryediplomati grek: Jemi në favor të heqjes së vizave për Kosovën
Ka përfunduar takimi mes ministres së Jashtme të Kosovës, Donika Gërvalla dhe ministrit të Jashtëm të Greqisë, Nikos Dendias i cili sot po qëndron për vizitë në Kosovë.
Gërvalla pas takimit ka deklaruar se i pret hapat e ardhshëm për marrëdhënie të ndërsjella në fushën e ekonomisë, tregtisë e të politikës.
” Greqia është një fqinjë e rëndësishme për ne. Me Greqinë ndajmë mendimin që integrimi në NATO është i rëndësishëm. Kosova dhe Greqia janë pajtuar që të ngrihet zyra në Athin dhe të kthehet në zyre ekonomike. Njohja dhe pavarësia e vendit tonë përfshirë Greqinë e konsiderojmë si një kontribut për paqe në Ballkan. Duke pasur parasysh faktin që Greqia e sheh pavarësinë e Kosovës nga një kënd tjetër do të vazhdojmë dialogun rreth kësaj çështje. Me kolegun tim biseduam rreth bashkëpunimit kulturor e ekonomik”, ka deklaruara ajo.
Kurse ministri Dendias ka thënë se dëshirojnë të zgjerojnë marrëdhëniet ekonomike dhe tregtare.
“Ne besojmë se i mbarë Ballkani Perëndimor duhet të lidhet. Prania ime këtu është edhe për të përçuar një mesazh që Greqia për dy dekada ka punuar për integrimin në Ballkanin Perëndimor. Ballkani Perëndimor i takon Evropës”, ka thënë ai.
Ai ka folur edhe për liberalizimin e vizave duke thënë se kanë mbajtur qëndrim në Këshillin Evropian.
“Ne jemi në favor të liberalizimit të vizave pasi vendi juaj i ka përmbushur të gjitha pika. Si Greqi, keni mbështetjen për sundimin e ligjit, luftën kundër krimit e korrupsionit. Ne jemi këtu nëse keni nevojë për ndihmën tonë në këtë drejtim. Kemi zyrtarë grekë në kuadër të misionit të EULEX-it që punojnë në këtë çështje. Ne pavarësisht qëndrimit tonë neutral dhe statusit të Kosovës, kemi një zyrë në Athinë e cila që nga viti 2019 vazhdon të jetë atje dhe të merret me çështje ekonomike dhe ne shpresojmë që kjo zyrë të jetë ndihmë edhe më shumë në marrëdhëniet tona Greqi-Kosovë”, tha ai.
Ai ka folur edhe për dialogun Kosovë Serbi.
“E mbështesim dialogun dhe u bëjmë thirrje të dyja palëve që të gjejnë zgjidhje sepse kjo zgjidhje do të stabilizojë të gjithë rajonin”, ka thënë ai.
Kryediplomati grek në Kosovë, takohet me ministren Gërvalla
Ministri i Punëve të Jashtme i Greqisë, Nikos Dendias, po qëndron sot në Kosovë. Ai është takuar me ministren Donika Gërvalla.
Kryediplomati grek viziton Kosovën
Ministri i Punëve të Jashtme i Greqisë, Nikos Dendias, do të vizitojë sot Kosovën.
Gjatë kësaj vizite kryediplomati grek fillimisht do të takohet me ministren e Punëve të Jashtme dhe Diasporës, Donika Gërvalla. Pas takimit Gërvalla dhe Dendias do të mbajnë konferencë për medie.
Kryediplomati grek do të takohet edhe me presidenten e vendit, Vjosa Osmani, kryeparlamentarin Glauk Konjufca dhe kryeministrin Albin Kurti.
Kujtojmë që Dendias ka vizituar Kosovën edhe më 09 tetor të 2020-tës, kur në krye të Qeverisë ishte, Avdullah Hoti dhe ushtruese e detyrës së presidentes ishte Vjosa Osmani.
Dendias me të arritur në Kosovë pati deklaruar para mediave se çështja e njohës së Kosovës është çështje e vendosjes së marrëdhënieve mes dy vendeve.
Agjenda e Nios Dendias gjatë vizitës në Kosovë:
Ministri grek, Nikos Dendias pritet në Aeroportin e Prishtinës nga ministrja e Punëve të Jashtme dhe Diasporës, Donika Gërvalla. (Aeroporti “Adem Jashari”, Prishtinë, ora 10:00)
Ministrja e Punëve të Jashtme dhe Diasporës, Donika Gërvalla zhvillon takim me homologun e saj grek, Nikos Dendias. Më pas të dy mbajnë konferencë për medie në ora 11:10. (Objekti i MPJD-së, ora 10:30)
Presidentja Vjosa Osmani pret në takim diplomatin grek, Nikos Dendias. (Presidenca e Kosovës, ora 11:40)
Kryeparlamentari Glauk Konjufca pret në takim ministrin e Jashtëm të Greqisë, Nikos Dendias. (Kuvendi i Kosovës, ora 12:20)
Kryeministri Albin Kurti takohet me diplomatin grek, Nikos Dendias. (Qeveria e Kosovës, ora 12:50).
