Kryediplomatja gjermane, Annalena Baerbock, ditën e dytë të qëndrimit të saj në Republikën e Kosovës, bashkë me kryeministrin Kurti, kanë bërë përurimin e parkut të ri të erës “Selac Windpark”, në fshatrat Selac dhe Bajgorë të komunës së Mitrovicës.
Kurti, përmes një shkrimi në Facebook, ka treguar se prodhimi i energjisë nga ky park me erë, me 27 turbina, do të mbulojë 10% të kapacitetit të instaluar të vendit tonë dhe do të ulë emetimet e CO2 për 247 mijë tonë.
"Me këtë investim Kosova ndërmerr hapin e parë të madh drejt një të ardhmeje më të qëndrueshme dhe të larmishme të furnizimit me energji të ripërtëritshme" shkruan ai.
Shkrimi i plotë:
Në ditën e dytë të vizitës në Kosovë të Ministres së Punëve të Jashtme të Gjermanisë, Annalena Baerbock, inauguruam parkun e ri të erës “Selac Windpark” në fshatrat Selac dhe Bajgorë të Mitrovicës.
Prodhimi i energjisë nga ky park me erë, me 27 turbina, do të mbulojë 10% të kapacitetit të instaluar të vendit tonë dhe do të ulë emetimet e CO2 për 247 mijë tonë.
Me këtë investim Kosova ndërmerr hapin e parë të madh drejt një të ardhmeje më të qëndrueshme dhe të larmishme të furnizimit me energji të ripërtëritshme.
Fjala ime e plotë në ceremoninë e inaugurimit:
Shkëlqesia juaj Ministre Baerbock,
I nderuar Z. Cornelius,
I nderuari zëvendëskryeministër Bislimi
E nderuar Ministre Rizvanolli,
Të nderuar përfaqësues të mediave,
Dhe të nderuar pjesëmarrës,
Është kënaqësi – edhe pse një kënaqësi shumë e ftohtë dhe me erë – të jem këtu me ju sot për inaugurimin zyrtar të parkut të erës Selac.
Me këtë investim Kosova ndërmerr hapin e parë të madh drejt një të ardhmeje më të qëndrueshme dhe të larmishme të furnizimit me energji të ripërtëritshme. Ne e mirëpresim me gjithë zemër këtë investim strategjik.
Agjenda e Gjelbër është një nga prioritetet e qeverisë sonë, jo vetëm sepse ajo përfshinë një aspekt të rëndësishëm të procesit tonë të integrimit në BE, por veçanërisht sepse ne kemi nevojë të ulim gradualisht përdorimin e qymyrit duke ruajtur pavarësinë tonë energjetike.
Tri aspekte janë të rëndesishme kur bëhet fjalë për këtë investim. I pari është diversifikimi i prodhimit të energjisë pasi prodhimi i energjisë nga ky park me erë do të mbulojë 10% të kapacitetit të instaluar të vendit tonë. I dyti është ulja e emetimeve të CO2 për 247 mijë tonë dhe i treti është se do të kontribuojë në furnizimin e përgjithshëm me energji që ndihmon në plotësimin e kërkesës sonë në rritje, veçanërisht pas krizës energjetike që pasoi këtë dimër. Qeveria jonë i është përgjigjur kësaj krize në një afat të shkurtër, duke bërë subvencionim për konsum të energjisë që i atribuohet familjeve. Megjithatë, është e qartë se në afat të gjatë zgjidhja e vetme e qëndrueshme është investimi në burimet e ripërtëritshme.
Nuk do të kishte një projekt më të mirë për të hapur rrugën si investimi i parë strategjik, se ky.
Së fundi, shfrytëzoj rastin të falënderoj SoWi Kosovo dhe z. Cornelius i cili përfaqëson kompaninë sot këtu. Falënderoj gjithashtu aksionerët e saj, Enlight Renewable Energy, Ilir Grapci dhe Christian Hammeke. Gjithashtu, Bankën Evropiane për Rindërtim dhe Zhvillim për financimin e këtij projekti të sektorit privat, i cili është më i madhi që kanë financuar deri më tani në Kosovë. Zonja Ministre Baerbock, vizita dhe përkushtimi juaj për zhvillimin e Kosovës vlerësohet shumë.
Ju falemnderit.
