Ligji i Pagave do të dalë në diskutim publik javën tjetër. Kështu deklaroi kryeministri Albin Kurti në një deklarim për media në Gjakovë, pasi mori pjesë në ceremoninë e përurimit të Abetares së përbashkët Kosovë-Serbi.
Derisa u bëri thirrje mësimdhënësve që t’i japin fund grevës, kyeministri i vendit siguroi mësimdhënësit se koeficienti i pagave i parashikuar për ta, do të jetë më i mirë sesa në të kaluarën.
Ai tha se e kupton që greva është instrument i sindikatave, por sindikatat nuk bën të jenë instrument i bojkotit të Qeverisë e shtetit.
“Shkolla nuk bën të bojkotohet. Është e drejtë elementare e çdo fëmije që të edukohet”.
Kryeministri Kurti deklaroi se shpreson që procesi mësimor të vazhdojë sepse asnjë ditë e humbur nuk kompensohet lehtë.
Ai u bëri thirrje prindërve e mësimdhënësve që ta kuptojnë se jemi në një moment historik dhe nuk bën të braktiset mësimi.
“Nuk ka kurrfarë urrejtje apo hakmarrje ndaj askujt. Por, një gjë duhet ta kuptoni – s’mund të paguhen njerëzit për punën që nuk e bëjnë. Ata duhet të paguhen për punën që bëjnë sipas meritës. Kjo është jo vetëm çështje e ligjit, por edhe e arsyes së shëndoshë mendore”.
