Shefi i Zyrës së Bashkimit Evropian në Kosovë, Tomas Szunyog, ka përshëndetur miratimin e marrëveshjeve ndërkombëtare në seancën e së premtës në Kuvend.
Në reagimin e tij, Szynyog tha se me miratimin e këtyre marrëveshjeve, Kosova e ka intensifikuar bashkëpunimin me BE’në.
“I lumtur dhe mirënjohës me këtë zhvillim”, shkroi ai ndër të tjera në Twitter.
Kuvendi i Kosovës ka miratuar të premtën tri marrëveshje, dy nga to me Bashkimin Evropian dhe me Republikën Federale Gjermane. Marrëveshjet e miratuara në seancën e djeshme plenare, janë në fushën e tatimit, doganave dhe bashkëfinancimit për “Projektin Parku i Inovacionit dhe Trajnimit Prizren”.
Marrëveshja e parë e miratuar nga deputetët është për pjesëmarrjen e Kosovës në programin “Fiscalis” të BE-së, për bashkëpunim në fushën e tatimeve. Kjo marrëveshje është miratuar me 86 votat pro të deputetëve.
Me po kaq vota është miratuar edhe marrëveshja mes Kosovës dhe BE-së, për pjesëmarrje të Kosovës në programin “Doganat” të BE-së.
Deputetët në seancën e sotme kanë miratuar me 83 vota marrëveshjen e bashkëfinancimit për projektin e “Parku i Inovacionit dhe Trajnimit në Prizrenit”, mes Kosovës dhe Republikës Federale Gjermane, i cili ka vlerë prej pesë milionë euro.
