Kryeministri Kurti flet rreth buxhetit që u miratua në Kuvend, tregon si do të ndahet

Aktuale

Kryeministri Kurti flet rreth buxhetit që u miratua në Kuvend, tregon si do të ndahet

Nga: N.E. Më: 15 dhjetor 2022 Në ora: 22:07
Kryeministri i Kosovës, Albin Kurti

Kuvendi i Kosovës ka miratuar sot buxhetin për vitin 2023 dhe për këtë reagoi edhe kryeministri Albin Kurti.

Kurti ka thënë se buxheti për vitin e ardhshëm prej 3.2 miliardë është jo vetëm më i larti ndonjëherë, por edhe më gjithëpërfshirësi.

Sipas tij, buxheti nënkupton 3.2 miliardë për arsim, shëndetësi, ushtri, bujqësi, ekonomi e kulturë.

“Me 65 vota për, Kuvendi i Republikës së Kosovës e votoi Buxhetin për vitin 2023.

3.2 miliardë është buxheti i Republikës sonë për vitin e ardhshëm, e që është jo vetëm më i larti ndonjëherë, por edhe më gjithëpërfshirësi.

Kjo nënkupton 3.2 miliardë euro për arsimin, shëndetësinë, ushtrinë, bujqësinë, ekonominë e kulturën. Mirëpo, mbi të gjitha nënkupton 3.2 miliardë euro për rininë, gratë e grupet e cenueshme të shoqërisë sonë”, ka shkruar Kurti në Facebook.

Ai ka treguar se si do të ndahet buxheti.

“Rreth 300 milionë euro për investime në shëndetësi, që të ofrohen shërbime cilësore shëndetësore, si dhe 400 pozita me tepër për stafin shëndetësor.

Rreth 280 milionë euro për arsim, për ndërtimin e çerdheve dhe infrastrukturës së avancuar arsimore, si dhe 743 pozita të reja për stafin arsimor.

Mbi 300 milionë euro për sigurinë dhe ushtrinë, për investime në siguri e armatim modern, si dhe 300 pozita të reja për Policinë.

Rreth 90 milionë euro për bujqësinë, për të vazhduar e për të rritur mbështetjen për fermerët tanë, që të sigurohet prodhimi vendor në këtë kohë krize, por edhe prodhimi vendor në afat të gjatë. Rreth 60 milionë euro për kulturën e sportin për aktivitete e infrastrukturë kulturore e sportive”, ka thënë Kurti.

Kryeministri ka njoftuar se do të shtohen 240 pozita të reja për inspektoratet.

“Për të siguruar shërbime publike më të mira e mbrojtje të të drejtave të qytetarëve tanë, do të shtohen 240 pozita të reja për inspektoratet.

Përveç këtyre kemi ndarë buxhet edhe për shumë projekte të tjera e premtime tona. Kemi ndarë 60 milionë euro për shtesa për lehona e shtesa për fëmijë, 15 milionë euro për rezervat shtetërore, 20 milionë euro për punësim, 40 milionë euro mbështetje për investime në ndërmarrje publike, e 6 milionë euro për funksionalizim të terminaleve doganore shtetërore.

Shumë nga premtimet tona na është thënë se nuk do të bëhen, e se nuk e kemi buxhetin e mjaftueshëm, mirëpo shtesat për lehona e për fëmijë u bënë, çerdhet po ndërtohen, punësimi po rritet, terminalet po bëhen shtetërore e prodhimi vendor po shumëfishohet. Kështu do të vazhdojmë edhe me premtimet e tjera e me buxhetimin e tyre në vitet e ardhshme”, ka deklaruar Kurti.

commentFirst article
Sot mund të lexoni Shfletoni kopertinat