Në margjina të Forumit Ekonomik Botëror që po mbahet në Davos të Zvicrës, kryeministri i Republikës së Kosovës, Albin Kurti ka takuar Kryeministren e Finlandës, Sanna Marin të cilën e ka falënderuar për kontributin e Finlandës për Kosovën para dhe pas shpalljes së pavarësisë.
Nga ana tjetër, kryeministrja Marin shprehu mbështetjen për Kosovën për anëtarësim në Këshillin e Evropës dhe në Bashkimin Evropian.
Në njoftimin e Qeverisë së vendit thuhet se në këtë takim është biseduar për rritjen në 70 të numrit të ushtarëve finlandez në Forcat paqeruajtëse të NATO-s në Kosovë (KFOR).
Kryeministri Kurti theksoi se Qeveria e Republikës së Kosovës është e përkushtuar për reforma strukturore në ekonomi, politikë, sundim të ligjit dhe demokraci funksionale në përputhje me standardet evropiane, për marrëdhënie të mira fqinjësore dhe bashkëpunim rajonal.
