Komandanti i KFOR-it, gjeneralmajor Angelo Michele Ristuccia, ka qëndruar në Bruksel dhe ka zhvilluar takime të nivelit të lartë në selinë e NATO-s dhe të Bashkimit Evropian. Sipas një komunikate për media, ai informoi Komitetin Ushtarak të NATO-s dhe Këshillin e Atlantikut të Veriut për zhvillimet e fundit në Kosovë dhe për prioritetet e KFOR-it.
Ristuccia u takua me Sekretarin e Përgjithshëm të NATO-s, Jens Stoltenberg,
“Komandanti i KFOR-it nënvizoi situatën e brishtë të sigurisë dhe rëndësinë e fokusimit të përpjekjeve kolektive në tejkalimin e mënyrës së menaxhimit të krizave”, thuhet në komunikatë.
“Ishte një punë e vështirë, në baza ditore, për të siguruar që KFOR-i do të vazhdojë të zbatojë mandatin e tij të OKB-së në mënyrë të paanshme dhe në komplementaritet me përpjekjet e bëra nga Komuniteti Ndërkombëtar. U bënë shumë përpjekje dhe u hasen shumë sfida për shkak të situatës komplekse”, citohet të ketë thënë Ristuccia.
Në komunikatë thuhet se ai k përsëritur përkushtimin e palëkundur të KFOR-it për të vazhduar “rolin e tij në krijimin e kushteve të nevojshme të sigurisë që dialogu i lehtësuar nga BE-ja ndërmjet Beogradit dhe Prishtinës të ecë përpara; si dhe nevojën që të dyja palët të de-përshkallëzojnë plotësisht situatën dhe të riangazhohen në dialogun e lehtësuar nga BE-ja në mënyrë konstruktive dhe me mirëbesim”.
Komandanti i KFOR-it është takuar në Bruksel edhe me ndihmës Sekretarin e Përgjithshëm të NATO-s për Operacione, Thomas Goffus dhe me përfaqësuesin special të BE-së për dialogun Kosovë-Serbi, Miroslav Lajçak.
