Prokuroria Themelore e Prishtinës e ka konfirmuar vjedhjen e ndodhur në banesën e ministres së Industrisë, Ndërmarrësisë dhe Tregtisë Rozeta Hajdari.
Kryeprokurori i Prishtinës Kujtim Munishi, tha se rasti ka ndodhur të dielën.
“Rasti është hapur si “Vjedhje e rëndë””, tha Munishi.
Ai nuk dha më tepër detaje rreth rastit pos asaj se janë duke u kryer hetimet e nevojshme.
Vjedhja në banesën e të parës së MINT-it është konfirmuar edhe nga policia.
Në raportin 24 orësh shkruan:
“Ankuesja femër kosovare ka informuar se persona të panjohur kanë depërtuar në banesën e saj dhe nga aty kanë kryer vjedhje. Lidhur me rastin janë ndërmarrë të gjitha veprimet e nevojshme për procedura të mëtejme hetimore”, thuhet në raport.
Sipas raportimeve të gazetës në orët e hershme të mëngjesit të sotëm, Hajdarit i janë vjedhur 2 mijë e 500 euro, dokumente personale përfshirë edhe një kartelë bankare që takon MINT-it.
