Kryeministri i Kosovës, Albin Kurti, sot pritet të takohet me Njësinë Speciale Intervenuese të Policisë së Kosovës e njohur si FIT, për të diskutuar rreth kërkesave të tyre.
Sipas burimeve, takimit pritet të mbahet rreth orës 16:00 në ambientet e Qeverisë.
Ndryshe, pjesëtarët e Njësisë Speciale Intervenuese të Policisë së Kosovës e njohur si FIT, patën protestuar para ndërtesës së Qeverisë të Kosovës më 1 nëntor, duke kërkuar ndryshim të kategorizimit të vendeve të punës dhe shtesa më të mëdha të rrezikshmërisë.
Përfaqësuesi i FIT-it gjatë protestës pati thënë se pakënaqësitë e tyre nuk datojnë nga sot, por janë më shumë se 10 vjet.
“Jemi njësi elite e Policisë së Kosovës. Pakënaqësitë tona nuk datojnë nga sot, por më shumë se 10 vite kemi marr premtime e asnjëra nuk është realizuar. Tek Ligji i pagave edhe pse kemi kërkuar ndryshim para nëntë muajsh, kërkesat tona nuk janë realizuar”, kishte thënë përfaqësuesi i FIT-it.
Përfaqësuesi i FIT-it bëri të ditur se kërkesat e tyre janë: kategorizimi si njësi të veçanta dhe përfshirjen në listën e ekspertëve, rrezikshmëria të caktohet në 50 për qind të pagës bazë dhe shtesa për kushte specifike të punës.
Ndërkaq, ata patën paralajmëruar edhe një protestë për në 7 nëntor, por e cila u pezullua pasi kryeministri Kurti u pati premtuar që do t’i pres në takim.
