Policia është ende në fazën e grumbullimit të informacioneve lidhur me gjetjen e një foshnje të pajetë në afërsi të Parkut të Qytetit të Prizrenit, më 25 nëntor.
Nga Prokuroria Themelore në Prizren kanë thënë se kanë autorizuar policinë për grumbullimin e informacioneve, për të ndërmarrë më pas veprime hetimore. Rasti ndërkaq është cilësuar “vrasje e foshnjës së porsalindur”.
Një ngjarje e rëndë kishte ndodhur më 25 nëntor në Prizren. Atë ditë në afërsi të Parkut të Qytetit u gjet e vdekur një foshnje e porsalindur. Nga Policia u pat konfirmuar se rasti po trajtohet si “vrasje e foshnjës së porsalindur”, teksa më nuk u dhanë më shumë detaje.
Ditëve në vazhdim nuk doli asgjë e re lidhur me fatin e kësaj foshnje dhe për atë se kush e la atë të vdekur në afërsi të Parkut të Qytetit të Prizrenit.
Për këtë çështje, nga Prokuroria Themelore në Prizren, kanë konfirmuar se kanë autorizuar policinë që të grumbullojë informacione për të ndërmarrë më pas veprime hetimore.
“Referuar kërkesës tuaj për informacione, ju njoftojmë se Prokuroria Themelore në Prizren, ka autorizuar policinë për grumbullimin e informacioneve dhe për ndërmarrjen e veprimeve hetimore. Prokuroria do t’ju mbajë të informuar lidhur me rastin”, thuhet në përgjigjen e tyre.
E detaje nuk dhanë lidhur me atë se nëse ka ndonjë të dyshuar për, siç cilësohet vepra, vrasjen e kësaj foshnje.
Ndërkaq, nga policia patën thënë se foshnja ishte gjetur nga një person, teksa me vendim të prokurorit trupi i foshnjës është dërguar për obduksion.
“Policia në Prizren ka pranuar një informatë se në afërsi të Parkut të Qytetit, nga një dëshmitar okular, gjendet një trup i pajetë që bëhet fjalë një foshnjë. Reagimi policor ka qenë i menjëhershëm, njësitë relevante kanë dalë në vendin e ngjarjes. Është njoftuar Prokurori i Shtetit dhe me urdhër të tij trupi i pajetë është dërguar në IML për obduksion. Po ashtu në vendin e ngjarjes ka dalë edhe ekipi i Emergjencës ku mjeku ka konstatuar vdekjen e foshnjës. Me këtë rast po merrren hetimet rajonale dhe po trajtohet si ‘Vrasje e foshnjës së porsalindur’, në konsultim me Prokurorin e Shtetit kështu do të fillojnë hetimet dhe po trajtohet si rast i kësaj natyre”, pati thënë zëdhënësi I policisë për rajonin e Prizrenit, Vesel Gashi”, thuhet në njoftim.
