Policia e Kosovës ka arrestuar mjekun e Qendrës Kombëtare të Transfuzionit të Gjakut, Betim Morinën. Morina dyshohet se e ka kërcënuar kolegen e tij të punës, shkruan Insajderi.
Shkak i kërcënimit po del të jetë kontrata e punës.
Prokurori i Prokurorisë Themelore në Prishtinë i ka caktuar Morinës masën e ndalimit prej 48 orësh.
Por pas shqiptimit të kësaj mase, i njëjti sipas informacioneve të medias ka kërkuar të dërgohet në spital duke thënë se nuk e ka gjendjen e mirë shëndetësore.
Për rastin, media ka provuar të marrë një përgjigje edhe nga drejtoresha e QKTGJ-së, Bukurije Zhubi, por e njëjta nuk është përgjigjur.
Ky nuk është rasti i parë që ky mjek bie në pranga të policisë. Edhe në vitin e kaluar ai ishte arrestuar për veprën penale “lëndim i rëndë trupor”.
I njëjti e kishte shkelmuar derën e zyrës së një punonjëse në QKKTGJ.