Drejtori i drejtorisë kundër trafikimit me njerëz në Policinë e Kosovës, Riza Murati, po akuzohet nga gruaja e tij për dhunë në familje. Znj. F. Murati në një rrëfim tronditës ka treguar se si ajo ishte objekt i dhunës sistematike nga burri i saj.
“Më ka rrahë para fëmijëve”, “Më ka kërcënu me vrasje dhe zhdukje të gjurmeve”, “E kam lanë punën, e kam ikë nga Kosova”, janë vetëm disa nga thekset kryesore të saj për Nacionale.
Vrasja e Eronës në Ferizaj dhe e Xhulietës në Pejë, brenda pak ditëve, të dyja viktima të burrave të tyre ka thënë ta ketë shtyrë znj. F, që rastin e saj ta rrëfejë para mediave, duke shtuar se ka qenë e frikësuar se fati i Eronës e Xhulietës mund t’a priste edhe atë.
Autoriteti dhe pushteti i burrit të saj, si Drejtor policie ka qenë pengesë e vazhdueshme që ky rast të marrë epilog, është shprehur znj.F.
“Një muaj kam qenë e vetme duke e kërku të drejtën time, duke mos marrë përgjigje për shkak se i njejti ka lidhje. Më ka thënë kam inspektorë, kam prokurorë” – thotë ajo.
Gjykata Themelore në Prishtinë ia kishte caktuar urdhërin mbrojtës znj.F. Pra, gjykata kishte urdhëruar që ajo të mbrohej nga burri i saj.
Në Aktvendimin thuhet: “Urdhërohet pala përgjegjëse Riza Murati nga Mitrovca, që të ndërpresë dhe të mos përsërisë asnjë veprim të dhunshëm ndaj palës së mbrojtur”. Tutje aty i ndalohet të njëjtit t’i afrohet më shumë se 50 metra në ambiente publike si dhe 100 metra nga vendbanimi i saj.
Madje në aktvendimin e gjykatës ekziston edhe një urdhër ndaj Stacionit policor në Mitrovicë, që palën e mbrojtur ta shoqërojë me qëllim të mbrojtjes, gjatë marrjes së gjërave personale në shtëpinë e palës përgjegjëse, pra nga shtëpija e Riza Muratit.
Paradoksalisht në krye të këtyre njësiteve është pikërisht “pala përgjegjëse” për këtë rast, pra Riza Murati.
Nacionale ka kontaktuar z.Riza Murati për t’a pyetur në lidhje me këtë rast. I njëjti porsa ka dëgjuar pyetjen, e ka mbyllur telefonin.
