Ministri i Ministrisë për Forcën e Sigurisë të Kosovës, Haki Demolli priti sot në takim një delegacion të NATO-s të kryesuar nga Paul Savereux, drejtor i Divizionit për Plane dhe Politika të Mbrojtjes të Aleancës, i cili sot mandaton Ekipin këshillues ndërlidhës të NATO-s për Ministrinë dhe FSK-në.
Në një njoftim për media, thuhet se ministri Demolli e falënderoi delegacionin e NATO-s për angazhimin në ruajtjen e paqes në Kosovë dhe kontributit që ka dhënë KFOR-i për sigurinë në vend.
Më tej, ministri Demolli tha se objektivi i Kosovës është që të promovojmë paqe në vend dhe më gjerë, si dhe objektivat të përputhen me vendet tjera të Bashkimit Evropian, aty ku vendi synon që të integrohet.
Në veçanti, ministri Demolli në takim me delegacionin e lartë të NATO-s, tha se Republika e Kosovës është e interesuar që ta thellojë bashkëpunimin me NATO-n, duke përmendur këtu iniciativën e Qeverisë dhe Kryeministrit të vendit dhe letrën që kryeministri Isa Mustafa i ka drejtuar NATO-s.
“Gjithashtu, ministri i FSK-së, Haki Demolli e njoftoi delegacionin e NATO-s edhe mbi rekomandimet e dala nga Rishikimi Strategjik i Sektorit të Sigurisë, për punën që ka bërë Ministria për Forcën e Sigurisë dhe Forca e Sigurisë në drejtim të draftimit të amendamenteve kushtetuese, pakos së ligjeve dhe planifikimin afatgjatë në drejtim të përgatitjes sa më të mirë të procesit të transformimit të Forcës së Sigurisë të Kosovës në Forca të Armatosura të Kosovës(FAK), pas vendimit politik që pritet të merret nga institucionet më të larta të vendit, duke u shprehur se i tërë procesi që nga RSSS-ja dhe deri tani, ka qenë një proces plotësisht transparent dhe se kështu do të vazhdojë edhe në të ardhmen”, thuhet në njoftim.
Ndërsa, Komandanti i Forcë së Sigurisë të Kosovës, gjenerallejtënant Rrahman Rama e njoftoi delegacion nga Brukseli për zhvillimin dhe profesionalizimin e FSK-së, besueshmërinë e lartë që ka FSK-ja në opinionin vendor si dhe rritjen e kësaj besueshmërie edhe tek minoritetet që jetojnë në Kosovë e posaçërisht tek pakica serbe.
Më tej, gjeneral Rama foli edhe për pjesëmarrjen e FSK-së, në trajnime dhe ushtrime jashtë vendit e sidomos në ushtrime rajonale të përbashkëta, ku FSK-ja, sipas të gjitha raporteve po tregon profesionalizëm dhe ndërveprueshmëri me të gjitha ushtritë e vendeve pjesëmarrëse.
Nga ana e tij, përfaqësuesi i NATO-s, Paul Savereux, drejtor i Divizionit për Politika dhe Plane në Aleancë tha se: ,,NATO është e përkushtuar për zhvillimin e Kosovës”, kjo siç tha ai, u konfirmua edhe në Samitin e NATO-s, të mbajtur në Varshavë të Polonisë.
Në fund, kreu i delegacionit të NATO-s, Paul Savereux tha se transformimi i FSK-së në FAK, varet nga shteti i Kosovës, duke shtuar se kjo duhet të bëhet në përputhje me mundësitë dhe nevojat e Kosovës, pra, për gjithë këtë proces dhe modalitetet vendos vetë Kosova.
