Ish-kreu i Forcës së Sigurisë së Kosovës (FSK), gjenerallejtënant Kadri Kastrati është shprehur pesimist se Kuvendi i Kosovës do të themelojë Forcat e Armatosura të Kosovës gjatë kësaj legjislature.
Ai ka thënë se është totalisht pesimist se kjo do të ndodhë gjatë këtij mandati. “E vetmja mundësi është që Qeveria e Kosovës duhet të punojë qysh tash për legjislaturën e ardhshme që t’i stimulojë partitë tjera serbe të cilat më herët kanë qenë të vullnetshme ta votojnë këtë ndryshim kushtetues. Këtë e shoh të vetmen dalje nga kjo rrugë pa fund”, ka thënë Kastrati. Gjithashtu ai ka thënë se do të duhej që Qeveria të negociojë me Listën Serbe për krijimin e FAK-ut.
Kastrati ka vlerësuar se FSK-ja është e gatshme që ta merr mandatin e ri. “Është absolutisht e gatshme që të merr mision e ri. Unë jam shumë i bindur se ka avancuar edhe më shumë qe një vit e gjysmë sa më unë nuk jam aktiv. FSK është e gatshme dhe mund të krahasohet jo vetëm me ushtritë e rajonit por edhe me shumë ushtri të shteteve që janë anëtare të NATO-s”, ka shtuar ai, në një intervistë për mediat vendore.
Kastrati ka folur edhe për angazhimin e tij në jetën politike. Ai ka thënë se ka ende mundësi për t’i dhënë Kosovës.
Kastrati ka bërë me dije se ka oferta nga shumica e partive politike në Kosovë, por nuk ka vendosur ende cilës t’i bashkohet. Për një gjë është i sigurt se në zgjedhjet e ardhshme do të jetë pjesë e ndonjërës parti.
