Ushtarët e UÇK-së, nën komandën e Ramush Haradinajt ishin më të armatosurit gjatë luftës në Kosovë. Nga 383 armë të rënda që kishte gjithë Ushtria Çlirimtare e Kosovës 253 gjendeshin në zonën e Dukagjinit. Kështu dëshmon një dokument i nënshkruar nga Shefi i Shtabit të Përgjithshëm të UÇK-së, Agim Çeku.
Ushtarët e kësaj zone, ishin të vetmit që posedonin top 160 mmilimetërsh e mitraloz të kalibrit të rëndë 14.5 milimetërsh.
Për dallim nga bashkëluftarët e Drenicës, Llapit e rajoneve tjera të Kosovës, sipas këtij dokumenti ushtarët nën komandën e Haradinajt, tani kryeministër i Kosovës, ata posedonin shumëfish më shumë armatim të rëndë.
Derisa në Drenicë ishin 5 “Minahedhës 60 mm” në Dukagjin ishin 54. Në shalë kishte vetëm 3 të tillë, e vetëm 1 ishte në Llap e Nerodime.
Fjala posedon listën e plotë të armëve të rënda të deklaruara në Shtabin e Përgjithshëm dhe të pranuara nga Agim Çeku, të cilat përfshinë lloje të mitralezëve, topave, minahedhësve dhe laserëve.
Aty shihet se të gjithë pjesëtarët e UQK-së në 11 zona kishin në dispozicion 118 “Laser raketash anti-tank”, 79 “Minahedhësa 82 mm”, 66 “Minahedhësa 60 mm”, 44 “Mitraleza 14,5 mm”, 37 “Topa pa dridhje 75 mm”, 23 “Lanser raketash 40 mm”, 8 “Top zis 76 mm M42”, 2 “Minahedhësa 120 mm”, 2 “Top 160 mm”, 1 “Top 20 mm”, 1 “Mitralez 14.5 mm”, 1 “Minahedhës 107 mm” dhe 1 “Top Kundërajror 20 mm”.
Nga 79 Minahedhës 82 mm-ërsh që kishte në dispozicion e tërë UÇK-ja, 70 gjendeshin vetëm në Dukagjin.
Pas Dukagjinit, me armatim renditet Zona e Drenicës, që kishte në dispozicion 45 lloje të armatimit të rëndë, pasuar nga Zona e Shalës me 30 armë.
Në të tjerat zona lloje të armatimit të rëndë kishte më pak.
Në Zonën e Llapit, ushtarët kishin vetëm 10 armë të rënda. Po kështu edhe në Zonën e Pashtrikut ishin vetëm armë 9, në Nerodime 15 dhe në Karadak 13.
Ndërkaq, me demilitarizimin e Ushtrisë Çlirimtare të Kosovës, një pjesë e madhe e këtij armatimi thuhet të jetë dorëzuar në institucionet komeptente.
Përfitues i tyre është edhe Muzeu i Kosovës.
Sadik Krasniqi, shef i sektorit të Historisë në Muzeun e Kosovës, ka thënë më parë për medie se Muzeu i Kosovës posedon një numër jashtëzakonisht të madh me relikte, por në mesin e tyre ka shumë armë të luftës së fundit që janë përdorur nga UÇK-ja kundër ushtrisë serbe.
“Mbi 2 mijë ekzemplarë ekzistojnë në Muze të Kosovës të armëve, në mesin e tyre janë edhe kundërajrori 12, 7 milimetra, një top i madh rreth 90 milimetra dhe është një minahedhës 120 milimetra”, tregon Krasniqi, për këto lloje të armëve që UÇK-ja i ka përdorur në Koshare.
E krahas kësaj, Krasniqi thotë se ka edhe eksponate të tjera, si topi 75 milimetra, pastaj armë të lehta krahu siç janë kallashnikovi, prodhime të ndryshme jugosllave, kineze, sovjetike.
