Të dënuarit për vrasje i ulet dënimi, revoltohet vëllai i viktimës

Aktuale

Të dënuarit për vrasje i ulet dënimi, revoltohet vëllai i viktimës

Më: 19 janar 2018 Në ora: 09:31
Pallati i Drejtësisë

Vëllai i Fadil Makolllit është revoltuar, pasi iu ul dënimi vrasësit të vëllait të tij.

Fidan Makollit, i është ulur dënimi  për të dytën herë për akuzën për vrasje të djalit të axhës, Fadil Makollit.

E uljen e dënimit të tij, vëllai i të ndjerit, Ali Makolli e quajti absurd, duke iu referuar djalit të axhës së tij, njëherësh edhe vrasësit të vëllait të tij, si “kriminel”.

“A është kjo drejtësi? Kur një kriminel e vret djalin e axhës e gjykatat tona e dënojnë njëherë 18 vjet, e kthejnë në rigjykim e dënojnë me 15 vjet. Pastaj Apeli ia ul në 13 vjet. Çfarë drejtësie është kjo?”, tha ai.

Aliu po pretendon se ulja e dënimit ndodhi për shkak të ndikimit.

Kallxo ka kontaktuar me avokatin e familjes së dëmtuar, Betim Shalën, i cili tha se ende nuk ka bërë ankesë, por se do ta bëjë një të tillë.

“Unë nuk kam parashtruar ende ankesë, pasi që ka ushtruar prokurori i rastit”, tha Shala, duke lënë të hapur opsionin që edhe ky vetë të ushtrojë ankesë.

Por këto akuza i ka refuzuar në tërësi avokati i të akuzuarit, Besnik Jakupi.

Jakupi tha se nuk qëndrojnë akuzat për ndikim në gjykata.

“Nuk qëndron fakti se dikush nga familjarët e të mbrojturit tim Fidan Makolli të ketë ndikuar në zbutjen e dënimit. Në arsyetimin e aktgjykimit në mënyrë bindëse janë përshkruar rrethanat lehtësuese të cilat kanë ndikuar në zbutjen e dënimit”, tha Jakupi.

Ai shtoi se ky dënim përfundimtar është në përputhje të plotë me peshën e veprës penale dhe përgjegjësinë penale të kryerësit të veprës.

Në dhjetor të vitit të kaluar avokati i të akuzuarit Makolli, Besnik Jakupi, konfirmoi uljen e dënimit për herë të dytë ndaj klientit të tij, nga 15 vjet burgim në 13.

Në mars të vitit 2017 shkalla e parë e kishte dënuar Makollin me 18 vjet burgim.

Pas ankesës së avokatit të tij, Gjykata e Apelit e ka kthyer rastin në rigjykim, gjykim ky që në fund nxori verdiktin me dënim prej 15 vjetësh, tre vjet më pak se në gjykimin e kaluar.

Pas kësaj, avokati përsëri kishte bërë ankesë në Gjykatën e Apelit, me ç‘ rast tani më i ka ulur dënimin nga 15 vjet në 13, dënim ky në të cilin do t’i llogaritet edhe koha e kaluar në paraburgim.

Sipas aktakuzës, i ndjeri Fadil Makolli ka parkuar veturën afër furrës “Sharri”, me ç’ rast i akuzuari Fidan Makolli ka dalë nga shtëpia dhe i ka thënë tani të ndjerit të mos e parkojë veturën në atë vend.

Pas një konflikti verbal në mes të djemve të axhës, i akuzuari Fidan Makolli kishte shtënë në drejtim të Fadil Makollit, i cili vdiq 35 ditë më vonë.

commentFirst article
Sot mund të lexoni Shfletoni kopertinat