Analisti politik Leon Duhanaj, ka vlerësuar se situata politike në vend, është e brishtë.
Ai, duke folur në një prononcim për gazetën “Bota sot”, si arsye për këtë situatë, ka përmendur edhe Gjykatën Speciale dhe vrasjen e liderit të Iniciativës qytetare serbe, Oliver Ivanoviq.
Marrë parasysh këto, siç ka thënë Duhanaj, edhe agjenturat e huaja, nuk ndalojnë së vepruari në dëm të shtetit të Kosovës.
“Situata politike në vend është tejet e brishtë për arsye se, politika vendore, është duke u marrë me vetveten dhe pothuajse në të gjitha pikat apo temat kyçe ka kontraversitet dhe amulli, që ndikon në shtimin e pasigurisë për qytetarët dhe vendin. Është çështja e Gjykatës Speciale, e cila e ka ndikuar mjaftë vendimmarrjen në vend. Duke patur parasysh këto rrethana, edhe agjenturat e huaja, të cilat asnjëherë nuk ndalojnë se vepruari në dëm të shtetit të Kosovës në veçanti dhe shqiptarëve në përgjithësi. Tani lirisht mund të konkludojmë të tilla rryma, janë në veprim e sipër, sidomos pas aktit të vrasjes së Oliver Ivanoviqit”, ka thënë Duhanaj për “Bota sot”.
Duhanaj ka theksuar se vrasja e Ivanoviqit, ka për qëllim destabilizim e Kosovës, ndërkohë që ka kërkuar që shqiptarët të mos bëhen pjesë e lojërave të fëlliqura.
“Kjo vrasje, ka për qëllim destabilizimin e Kosovës. Këndej është e udhës që ta ruajmë qetësinë dhe të mos bëhemi pa dashje pjesë e lojërave të flliqta antishqiptare”, ka shtuar Leon Dunahaj.