Deputeti i Kuvendit të Kosovës nga radhët e Lidhjes Demokratike të Kosovës, Driton Selmanaj, ka thënë se kërkesa e partisë së tij për zgjedhje të parakohshme në vend s’ka ardhur rastësisht.
Selmanaj ka deklaruar se LDK është në kohën më të mirë të saj – të paktën në 10 vjetët e fundit.
Ai ka thënë se në LDK “ka një punë ekipore, një harmoni brenda grupit parlamentar, dhe brenda vetë subjektit”.
Selmanaj po ashtu ka thënë se mungesa e kryetarit të LDK’së, Isa Mustafa, është ndier gjatë muajve të fundit.
Ai e ka quajtur të rëndësishme mungesën e Mustafës, i cili ka qëndruar disa muaj në Gjermani, për shërim.
Mustafa është shtylla kryesore e partisë, ka deklaruar Selmanaj në “Pressing” të T7.
Deputeti i LDK’së ka thënë se partia e tij është e gatshme për zgjedhje nacionale sivjet, edhe para se t’i hyjë procesit të zgjedhjeve të brendshme, vitin e ardhshëm.
Ai i ka folur edhe për shprehjen e interesimit nga anëtarë të caktuar të partisë për t’u bërë kryetar i ardhshëm i subjektit.
“Zërat individualë i shoh si vlera, jo diçka të pazakontë”, ka thënë Selmanaj. Ai ka thënë se LDK ka potencial që të nxjerrë 10 emra për kryetar – ndryshe nga partitë e tjera.