Sonte, në emisionin “Pressing”, po diskutohet për tensionet gjithnjë e në rritje në Kuvendin e Kosovës, ku debatet e ashpra i kanë hapur rrugë konflikteve fizike mes deputetëve.
Deputeti i Kuvendit të Kosovës nga radhët e Lidhjes Demokratike të Kosovës, Arben Gashi, ka treguar për sulmin fizik ndaj tij nga deputeti Xhavit Haliti, nga Partia Demokratike e Kosovës.
“Më tha: Lëshoma rrugën dhe ka vazhduar”, ka bërë të ditur Gashi.
“Ishte kohë e shpejtë. Nuk ka pasur debat verbal”, ka theksuar ai.
Gashi ka folur edhe për përplasjen me deputetin nga Aleanca për Ardhmërinë e Kosovës, Gani Dreshaj.
“Në ato tollovi, sepse u përfshinë shumë deputetë, e kam parë se erdhi dikush nga mbrapa dhe tha diçka”, ka treguar ai.
“Nuk e kuptoja çfarë ka, pse ky person, nga doli”, është shprehur Gashi.
“Për disa sekonda nuk e kuptova se çfarë po ndodh”, ka thënë ai në T7.
Ai nuk ka pranuar të tregojë se çfarë i ka thënë Dreshaj. “Janë fjalë që nuk dua t’i përdor në këtë studio”, ka thënë Gashi.
Gashi ka thënë se nuk ndihet aspak i kërcënuar nga Haliti apo Dreshaj.
“Nuk ndihem i intimiduar prej tyre. Personalisht, fizikisht, moralisht, nuk kam asnjë lloj intimidimi prej tyre”, është shprehur ai.
I pyetur nëse Haliti e Dreshaj duhet të ndihen të rrezikuar nga Gashi, ai është përgjigjur: “Nuk ma merr mendja”.
Gashi ka thënë se pas përplasjeve, nuk e kam takuar më Halitin.
Deputeti i LDK’së ka përgënjeshtruar raportimet se mes tij dhe deputetit të PDK’së ka diçka personale.
