Sot qeveria e Kosovës ka miratuar Projektligjin për Kompetencat e Zgjeruara për Konfiskimin e Pasurisë.
Këtë lajm, e ka konfirmuar kryeministri i Kosovës, Ramush Haradinaj ku ka shkruar në facebook se me këtë ligj, abuzuesve me paranë publike, dhe të gjithë atyre që përfitojnë në mënyrë kriminale, u dërgohet mesazh, se përveç se do të ndiqen penalisht, pasuria dhe prona e përfituar do t’u konfiskohet dhe do t’i kthehet shtetit.
Postimi i plotë:
Edhe kjo Mbledhje e Qeverisë ishte e vendimeve të shumta dhe të rëndësishme. Prezantimi i zonjës Apostolova, ishte edhe një konfirmim se Kosova fuqishëm qëndron në rrugën drejt integrimit europian. Qeveria e Kosovës mbetet e përkushtuar që sfidat drejt anëtarësimit të plotë të adresohen në mënyrën më efikase të mundshme.
Sot Prizreni ka të drejtë të festojë. Me kërkesë të kryetarit Haskuka, Qeveria e Kosovës i dha në shfrytëzim Komunës së Prizrenit, hapësirën për krijimin e Zonës së Veçantë Industri të Lehtë “Parku i Biznesit”, Zona Kadastrale Lubizhdë. Krijimi i kësaj zone industriale ka për qëllim ofrimin e saj në shfrytëzim për investitorët vendorë dhe të jashtëm, e cila do të ndikojë në zhvillimin ekonomik në Komunën e Prizrenit.
Njëkohësisht, sot i kemi dhënë një impuls të fuqishëm luftës kundër krimit dhe korrupsionit në Kosovë me aprovimin e Projektligjit për Kompetencat e Zgjeruara për Konfiskimin e Pasurisë. Me këtë ligj, abuzuesve me paranë publike, dhe të gjithë atyre që përfitojnë në mënyrë kriminale, u dërgohet mesazh, se përveç se do të ndiqen penalisht, pasuria dhe prona e përfituar do t'u konfiskohet dhe do t’i kthehet shtetit.
Në shërbim të fuqizimit të ligjit, sot më tepër se 600 prokurorë dhe gjykatës kanë përfituar nga vendimi i Qeverisë për Nivelizimin e Pagave, i përligjur nga Gjykata Kushtetuese. Ky vendim ndihmon thelbësisht përmirësimin e kushteve të punës të gjyqëtarëve dhe prokurorëve.
