Nënshkrimi i marrëveshjes ndërmjet Greqisë dhe Maqedonisë për kontekstin e emrit, i hap kësaj të fundit rrugën për t'u bërë anëtare e NATO-s.
Por, analisti Faik Krasniqi, thotë se Shqipëria si shtet anëtar në këtë organizatë ushtarake, duhet të përdor veton ndaj Maqedonisë, nëse ajo nuk e zbaton Marrëveshjen e Ohrit.
“Konsideroj se do të duhej edhe Shqipëria që është pjesë e NATO-së ta kërcënonte me veto Maqedoninë, deri atëherë kur shqiptarët e Maqedonisë do t'i gëzonin të drejtat e plota në bazë të nënshkrimit të Marrëveshjes së Ohrit. Kjo do të ishte ndihma më e madhe që do të mund t'i bënte shqiptarëve të Maqedonisë, në mënyrë që krahas sllavomaqedonasve edhe ata të ishin komb shtetformues në shtetin e Maqedonisë. Përndryshe, shqiptarët gjithmonë do të ngelin qytetarë dytësorë në shtetin e tyre, edhe pse përbëjnë mbi 40% të popullatës në Maqedoni!”, thotë Krasniqi për "Bota sot".
Sa i përket nënshkrimit të marrëveshjes ku Qevera e Zaevit pas disa negociatave me Greqinë, pranoi që shteti i tij nga e diela, të quhet, Maqedonia Veriore, ai mendon se ky traktat ka qenë i domosdoshëm për t'u bërë anëtare e NATO-s dhe e Bashkimit Evropian.
“Maqedonia e ka të domosdoshme anëtarësimin e saj në NATO, sepse ajo është mburoja më e mirë e sigurisë së Maqedonisë, por edhe mbrojtjen identitetit të kontestuar sllavomaqedonas. Por pa zgjidhjen çështjen e emrit, Maqedonia kurrë s'do të mund të bëhej anëtare e NATO-së, sepse Greqia gjithmonë do ta përdorte VETON e saj”, shtoi ai.
Ndryshe, Maqedonia aktualisht është anëtare e OKB, por zyrtarisht, si FYROM (Ish-Republika Jugosllave e Maqedonisë).