Zëvendëskryeministri i Kosovës, Enver Hoxhaj, ka pritur sot në takim zyrtar homologun e tij nga Maqedonia, Bujar Osmani, me të cilin ka diskutuar në lidhje me marrëveshjen për emrin, e cila u arrit fundjavën që lamë pas në mes të Shkupit dhe Athinës, duke i dhënë fund mosmarrëveshjes disa vjeçare.
Hoxhaj tha se arritja e kësaj marrëveshjeje është lajm i mirë jo vetëm për Maqedoninë, por edhe për vendet e tjera të Ballkanit Perëndimor, pasi që përbënë mbylljen e njërës nga çështjet më të rëndësishme të Ballkanit.
“E urova zëvendëskryeministrin Osmani për nënshkrimin e marrëveshjes për emrin, duke krijuar momentum të ri në Ballkan për zgjidhjen e çështjeve të hapura historike”, tha ai.
Në takimin me zëvendëskryeministrin Osmani, u diskutua edhe për mbledhjen e përbashkët me Maqedoninë, nga e cila pritet të dalin mbi 15 marrëveshje bashkëpunimi të nënshkruara, ndërkohë që shumë shpejt pritet edhe caktimi i datës së kësaj mbledhjeje.
Hoxhaj dhe Osmani folën edhe për zhvillimet në rajon dhe perspektivën evropiane të Ballkanit Perëndimor.
