Deputetja e Lidhjes Demokratike të Kosovës, Vjosa Osmani, ka kërkuar publikisht sqarime nga Zyra e Përfaqësueses së Lartë të Bashkimit Europian lidhur me mënyrën e formimit të Asociacionit të Komunave me shumicë serbe.
Osmani thotë që Përfaqësuesja e Lartë e BE’së, Federica Mogherini, kishte thënë në Kuvendin e Kosovës që Asociacioni do të bëhet sipas Kushtetutës së Kosovës, kurse dje Këshilli i BE’së ka deklaruar që “Asociacioni duhet të jetë në përputhje me marrëveshjen e gushtit 2015 dhe atë të vitit 2013”.
Këtë mospërputhje të qëndrimeve të BE’së, Osmani e ka interpretuar si kërkesë të tyre ndaj Kosovës për ndryshim të Kushtetutës, me qëllim që Asociacioni të bëhet sipas marrëveshjes së Brukselit, të cilën Gjykata Kushtetuese e kishte shpallur antikushtetuese në shumë pika.
Ky është postimi i plotë i Osmanit në Facebook:
A PO KËRKON BASHKIMI EVROPIAN TA NDRYSHOJMË KUSHTETUTËN E KOSOVËS?
Më 6 maj 2016, Përfaqësuesja e Lartë Federica Mogherini kishte deklaruar para deputetëve të Kuvendit të Kosovës se ‘Asociacioni do të bëhet në përputhje me Vendimin e Gjykatës Kushtetuese.’
Dje, më 26 qershor 2018, Këshilli i BE-së, në konkluzionet për Kosovën deklaron se ‘Asociacioni duhet të jetë në përputhje me marrëveshjen e gushtit 2015 dhe atë të v.2013.’
A mundet dikush nga BE ta sqarojë pse ky kthim prapa? Pra tani kërkohet që të injorohet Vendimi i gj.Kushtetuese, i cili kishte konstatuar se Statuti i Asociacioni nuk mund të hartohet sipas marrëveshjes së 25 gushtit meqë ajo binte ndesh me një sërë dispozitash kushtetuese. Prandaj, kërkesa e djeshme që ky statut të bëhet sipas marrëveshjes së gushtit 2015 mund të interpretohet si kërkesë për të ndryshuar kushtetutën e Kosovës.