Ministria e Kulturës, Rinisë dhe Sportit në bashkëpunim me UNICEF-in për herë të parë në Kosovë kanë certifikuar 30 mentorë vullnetarë rinor.
Me këtë rast ministri i Kulturës, Kujtim Gashi ka deklaruar se fuqizimi i të rinjve që bëjnë vullnetare po bëhet nga udhëzimi administrativ për vullnetarë.
Duke inkurajuar të rinjtë që sa më shumë të merren me këto lloj aktivitetesh, Gashi u shpreh se nga sot të gjithë vullnetarëve do t’u njihet përvojat e tyre si vullnetarë.
Gashi: Me këtë certifikatë u njihet përvoja e punës
“Një brengë e vazhdueshme edhe e jona si Ministri që të gjithë të rinjtë tanë, të cilët kanë aplikuar për vende pune gjithmonë u është kërkuar përvoja e punës dhe sot është një mundësi e mirë që të shfrytëzohet kjo certifikatë që e lëshon Ministria, ku përmes kësaj certifikate njihet përvoja e punës në periudhë një vjeçare, dhe besoj që ky proces do të jetë inkurajues për të gjithë të rinjtë e Republikës së Kosovës që kërkojnë punë vullnetare në komunitet në të gjitha komunat, nëpër organizata, nëpër institucione dhe të jenë pjesë e të gjitha përpjekjeve tona për ta rregulluar njëherë e përgjithmonë çështjen të rinjve, brengat e të rinjve”, u shpreh Gashi.
Shefi i Zyrës së UNICEF-it në Kosovë, Brandao Co u shpreh se certifikimi i vullnetarëve është shembull i mirë jo vetëm për Kosovën, por edhe për botën.
Co: Puna e kësaj ministrie shembull jo vetëm për Kosovën?
“Tani, puna juaj është pranuar zyrtarisht, e vërtetuar me udhëzimin administrativ të kësaj ministrie dhe ka qenë një shembull shumë i mirë jo vetëm për Kosovën por edhe për rajonin dhe globalisht. Përvoja e Kosovës është përsëritur në vullnetarë në shumë vende tani dhe është e njohur kudo”, tha shefi i zyrës së UNICEF-it.
Kurse, vullnetari i parë i certifikuar në Kosovë, Erzen Isufi duke inkurajuar që të rinjtë e Kosovës të merren sa më shumë me punë vullnetare u shpreh se tani e tutje do të ta kenë më të lehtë që t’i qasen tregut të punës duke kryer punës vullnetare.
Isufi: Të rinjtë t’u bashkohen platformës vullnetare?
“I kisha lutur të gjithë të rinjtë e Kosovës të cilët nuk e gjejnë vetën në tregun e punës për shkak të përvojës së punës të gjejnë praktika dhe të bëhen pjesë e platformës së vullnetarëve që është një platformë shumë e mirë dhe iu mundëson atyre që të bëjnë përvoja të reja dhe të jenë të gatshëm për tregun e punës”, tha ai.
Ndryshe, pjesë e platformës vullnetare në Kosovë janë 2698 vullnetarë, ku prej tyre 162 janë organizata dhe institucione publike.
