Edita Tahiri porositi mbi 1 mijë makiato për një muaj

Aktuale

Edita Tahiri porositi mbi 1 mijë makiato për një muaj

Më: 17 gusht 2018 Në ora: 20:11
Edita Tahiri

1 mijë e 417 euro u shpenzuan në pije  për zyrën e ish – Zëvendës Kryeministres Edita Tahiri në vitin 2012 vetëm për një muaj.

Ndër to, në faturën e muajit janar figurojnë 1 mijë e 384 porosi për makiato, specifikisht 625 prej tyre makiato të vogla dhe 759 makiato të mëdha.

Nga llogaritja e thjeshtë, i bie që për një ditë të jenë porositur rreth 40 makiato.

Restauranti ‘Amadeus’, i kontraktuar për të ofruar shërbime të pijeve për zyrën e Zv/Kryeministres, ka dërguar një faturë mujore të datave 01.01.2012 deri më 31.01.2012 që në total kap shumën 1 mijë e 917 euro.

Në këtë faturë me numër 10700/3819 janë të përfshirë shpenzimet për anëtarët e kabinetit të Tahirit.

Kallxo ka llogaritur shpenzimet specifike për zyrën e Tahirit që paraqet pjesën më të madhe të faturës së përgjithshme, saktësisht 1 mijë e 417 euro.

Ndër pijet që ishin porositur për zyrën e Tahirit  në muajin janar hyjnë edhe lloje të tjera të kafeve, pije të gazuara, lëngje frutash dhe ujë.

Në anën tjetër, shpenzimet për zyret e pesë anëtarëve tjerë të kabinetit, nuk kalojnë shifrën 99 euro për secilin.

Makiatot e Marsit 

Muaji i tretë i vitit 2012 shënoi një rënie të lehtë në numrin e makiatove të porositura për ZëvendësKryeministren e atëhershëme, Edita Tahirin.

Fatura mujore nga restauranti ‘Amadeus’, në total kapi vlerën 1 mijë 646 euro në dërgesa të pijeve.

Nga kjo faturë, në zyrën e Tahirit u shpenzuan 1 mijë e 164 euro në porosinë që përfshin 1 mijë e 74 makiato, respektivisht 625 të vogla dhe 449 të mëdha.

Fatura përfshiu edhe një sasi të kafeve, qumshtit me çokollatë, pijeve të gazuara dhe lëngjeve të frutave.

 Makiatot e Majit

Muaji i pestë i vitit qëndroi konstant sa i përket nevojës për kafeinë në zyrën e Edita Tahirit.

1068 vogla dhe 432 të mëdha u porositën në zyrën e ZëvendësKryeministres.

Fatura e përgjithshme për datat 1 maj- 27 maj 2012 u pagua me 1 mijë e 746 euro në total, ndërkaq vetëm në zyrën e Tahirit u shpenzuan 1 mijë e 247 euro.

Fatura përfshiu edhe një sasi të kafeve, qumshtit me çokollatë, pijeve të gazuara dhe lëngjeve të frutave.

Makiatot e Gushtit

Në muajin e gjashtë u zvogëlua në një masë të vogël numri i makiatove të porositura dhe u rrit drastikisht numri i kafeve express.

918 makiato ishin porositur për zyrën e Edita Tahirit  për datat 29 maj deri më 29 qershor 2012, prej të cilave 421 makiato të vogla dhe 497 makiato të mëdha.

Këtë muaj shërbimi me pije u bë nga kompania  ‘Ben-af’, që në faturën e përgjithshme llogariti 1 mijë e 593 euro shpenzim.

Nga kjo shumë, 1 mijë e 131 euro u shpenzuan nga zyra e Zëvendëskryeministres dhe të tjerat nga kabineti i saj.

Edita Tahiri më vonë shërbeu si Ministre pa Protofol për Dialogun Kosovë-Serbi, ndërsa momentalisht nuk ka ndonjë pozitë në qeveri.

Në dosjen prej qindra faturash të siguruar pasi BIRN ka paditur Zyrën e Kryeministrit në gjykatë, do publikohen fatura të shpenzimeve për 20 muaj qeverisje të Hashim Thaçit përfshirë këtu shpenzimet e 5 zëvendëskryeministrave tjerë të asaj kohe: Bujar Bukoshi, Edita Tahiri, Hajredin Kuçi dhe Behgjet Pacolli.

Pjesë e faturave janë edhe shpenzimet e kryera nga këshilltarë e shefa të kabineteve e deri te bodigardët e qeveritarëve të lartë.

commentFirst article
Sot mund të lexoni Shfletoni kopertinat