Ministria e Tregtisë dhe Industrisë (MTI) ka lëshuar urdhëresë për Inspektoratin e Tregut, e cila urdhëresë ka për qëllim të ndalojë dhe sanksionojë shitjen, shërbimin dhe dhurimin e duhanit dhe pijeve alkoolike personave nën moshën 18 vjeç.
Ministri Endrit Shala ka shkruar se kjo urdhëresë obligon Inspektoratin për zbatimin me përpikëri të nenit 15 të Ligjit Nr 06/L-034 për Mbrojtjen e Konsumatorit.
“Kjo urdhëresë ka për qëllim të ndalojë dhe sanksionojë shitjen, shërbimin dhe dhurimin e duhanit dhe pijeve alkoolike personave nën moshën 18 vjeç”, ka shkruar ai në Facebook..
Tutje thuhet se kjo urdhëresë obligon të gjitha pikat e shitjes në territorin e Republikës së Kosovës që aty ku janë të ekspozuara për shitje dhe shërbim këto produkte, të vendosin shenjat për ndalimin e shitjes dhe shërbimit të produkteve të Duhanit dhe Pijeve Alkoolike, personave më të rinj se tetëmbëdhjetë (18) vjeç.
“Të gjitha pikat e shitjes që u shesin dhe shërbejnë të miturve Duhan dhe Pije Alkoolike, do të ndëshkohen në përputhje me legjislacionin në fuqi”.