Familja e miliarderit britanik Hamish Harding, aventurierit që humbi jetën në shpërthimin e nëndetëses Titan me katër pasagjerë të tjerë, i ka bërë homazhe “babait të tyre të përkushtuar”.
Pesë pasagjerë vdiqën në shpërthimin e nëndetëses gjatë udhëtimit për në mbytjen e Titanikut – miliarderi Hamish Harding, biznesmeni pakistanez Shahzada Dawood dhe djali i tij Suleiman, oqeanografi francez dhe eksperti i Titanikut Paul-Henry Nargeolet dhe Stockton Rush, themeluesi i OceanGate.
Familja e Harding tha në një deklaratë se ai ishte një “eksplorues i pasionuar, pavarësisht nga terreni, i cili jetonte për familjen e tij, punën e tij dhe aventurën e radhës”.
Vdekja e tij la “një boshllëk në jetën tonë që nuk mund të plotësohet kurrë”, tha familja e tij, duke shtuar se ata ishin “të bashkuar në pikëllim” me familjet e viktimave të tjera.
“Me zemër të thyer dhe pikëllim të madh që ne vajtojmë humbjen e Zëvendës Presidentit tonë Shahzada Dawood dhe djalit të tij të dashur Suleman Dawood,” tha në një deklaratë Engro Corporation, një konglomerat pakistanez.
Një robot nënujor pa pilot i dërguar nga një anije kanadeze zbuloi rrënojat e nëndetëses të enjten rreth 488 metra nga harku i mbytjes shekullore, katër kilometra nën sipërfaqe, tha në një konferencë shtypi kundëradmirali i Rojës Bregdetare të SHBA-së, John Mauger.
“Mbetjet janë në përputhje me një humbje katastrofike të dhomës së presionit,” tha Mauger.
Sekretari i Jashtëm britanik James Cleverly e përshkroi shpërthimin e nëndetëses si “lajm tragjik” dhe tha se qeveria britanike po mbështeste familjet britanike të prekura.
Shtëpia e Bardhë njoftoi se familjet e të vrarëve “kanë kaluar një provë të rëndë gjatë ditëve të fundit dhe janë në mendimet dhe lutjet tona”.
