Dy pjesëtarë të marinës amerikane janë arrestuar me akuzën për dorëzimin e materialeve të ndjeshme të sigurisë kombëtare në Kinë, thanë zyrtarët amerikanë të enjten.
Oficeri Wenheng Zhao, 26 vjeç, u akuzua për konspiracion dhe ryshfet në lidhje me marrjen e afro 15,000 dollarëve në këmbim të fotografive dhe videove të informacionit të ndjeshëm ushtarak amerikan, thanë zyrtarët.
Detari i marinës amerikane, Jinchao Wei, mosha e të cilit nuk u bë e ditur, u akuzua për komplot për të dërguar informacione të mbrojtjes kombëtare në Kinë në këmbim të mijëra dollarëve.
Ndihmës Prokurori i Përgjithshëm Matt Olsen u tha gazetarëve në San Diego se “informacionet e ndjeshme ushtarake përfunduan në duart e Republikës Popullore të Kinës”./Reuters.
Ambasada kineze në Uashington nuk ka lëshuar akoma ndonjë koment për këto akuza.
Marrëdhëniet SHBA-Kinë kanë qenë të tensionuara prej vitesh për një sërë çështjesh të sigurisë kombëtare dhe tregtisë.
Shtetet e Bashkuara kanë akuzuar Kinën për spiunazh dhe sulme kibernetike, një akuzë që Pekini e ka hedhur poshtë. Kina ka deklaruar gjithashtu se është nën kërcënimin e spiunëve.
