Një gazetë ditore kineze ka thënë se presidenti i zgjedhur amerikan, Donald Trump është “naiv” pas komenteve të bëra nga ai që hedhin dyshim mbi politikën afatgjate të “një Kine” duke e njohur Pekingun dhe duke refuzuar lidhjet diplomatike me Tajvanin.
Një koment pa autor, i publikuar në gazetën kineze “Global Times” më 12 dhjetor, e ka paralajmëruar Trump se politika e “një Kine” siç është thënë aty, “nuk është për negocim” dhe se ajo “nuk mund të tregtohet”.
Trump i ka thënë “Fox News” më 11 dhjetor se ai nuk ndjehet i “obliguar ndaj politikës së ‘një Kine’ dhe do të mendonte ndryshe “nëse do të bënte marrëveshje me Kinën për gjëra të tjera, përfshirë edhe tregtinë”.
Ai ka shtuar: “Nuk do të doja që Kina të më diktojë mua”.
Komentet e Trump janë bërë një javë pasi ai e ka pranuar një telefonatë për t’ia uruar fitoren në zgjedhje, nga presidentja e Tajvanit, Tsai Ing-wen, gjest ky që e ka zemëruar Pekingun.
Kina e konsideron Tajvanin, një ishull që vetëqeveriset, si territor kinez.
Politika e “një Kine” e Uashingtonit daton nga viti 1979 kur SHBA-të kanë vendosur marrëdhënie diplomatike vetëm me Pekingun.
Artikulli në “Global Times” e ka cituar nëj analist për marrëdhënie me jashtë duke i quajtur komentet e Trumpit si “naive” dhe se si duhet të lexojë më shumë libra për marrëdhëniet SHBA-Kinë.
