Trump: Herët të diskutohet heqja e sanksioneve kundër Rusisë

Amerika

Trump: Herët të diskutohet heqja e sanksioneve kundër Rusisë

Më: 27 janar 2017 Në ora: 21:25
Presidenti i Shteteve të Bashkuara, Donald Trump dhe kryeministrja britanike Theresa May

Presidenti i Shteteve të Bashkuara, Donald Trump, tha se është shumë herët të diskutohet mundësia e heqjes së sanksioneve kundër Rusisë, porse shpreson të ketë "marrëdhënie të mira me Rusinë".

Ai i bëri këto komente në një konferencë për gazetarë së bashku me kryeministren britanike, Theresa May.

May është udhëheqësja e parë botërore që takoi Trumpin në Shtëpinë e Bardhë, pas inaugurimit të tij, javën e kaluar.

"Sa u përket sanksioneve, është shumë herët të flitet për to", tha Trump.

Më herët, këshilltarja e lartë Trumpit, Kellyanne Conway, tha për Fox News se heqja e sanksioneve amerikane kundër Rusisë është “në konsiderim e sipër”.

Shtetet e Bashkuara dhe Bashkimi Evropian kanë sanksionuar Rusinë, pasi kjo e fundit ka aneksuar gadishillin ukrainas të Krimesë në vitin 2014 dhe ka ndërhyrë në konfliktin në lindje të Ukrainës, midis forcave qeveritare dhe separatistëve pro-rusë.

Shtëpia e Bardhë ka konfirmuar se Trump do të bisedojë përmes telefonit me presidentin rus, Vladimir Putin, më 28 janar.

Sot mund të lexoni Shfletoni kopertinat