Kina ka filluar një program ambicioz të menaxhimit të motit, duke mbuluar një sipërfaqe prej 5.5 milionë kilometra katrorë, që është zonë më e madhe se e gjithë India. Është ky një program eksperimental, të cilin Pekini shpreson ta përfundojë deri në vitin 2025, i cili merret me menaxhimin e motit bazuar në teknologjitë e reja dhe kërkimet nga shkencëtarët kinezë. Gjatë pesë viteve të ardhshme, zona e mbuluar nga programi artificial i shiut dhe borës do të rritet për të arritur zonën e planifikuar, dhe në të njëjtën kohë rreth 580,000 kilometra katrorë do të ketë mbrojtje artificiale nga breshëri, dmth. do të aplikohet teknologjia e bllokimit të breshërit.
Shkencëtarët kinezë shpresojnë që programi të rezultojë në teknologji që do të përdoret gjerësisht, nga ndihma në rast të motit të keq, në përmirësimin e prodhimit bujqësor dhe reagimin ndaj emergjencave në rast zjarri dhe ndihmën në rast të temperaturave jashtëzakonisht të larta ose thatësirave. Kina tashmë po përdor teknologjinë e saj të menaxhimit të motit. Pekini tashmë është i njohur për qiellin pa re në kohë takimesh të rëndësishme dhe aplikoi teknologjinë e shpërndarjes së reve para Lojërave Olimpike 2008 për të zvogëluar smogun dhe për të shmangur shiun për gara të rëndësishme.
Mbjellja e reve si një koncept ka ekzistuar për dekada, shkruan CNN-i. Një studim amerikan, i financuar nga Fondacioni Kombëtar i Shkencës i SHBA-ve, botuar në fillim të këtij viti, arriti në përfundimin se mbjellja e reve mund të shkaktojë dëborë në një zonë të madhe kur kushtet atmosferike janë të favorshme. Nga ana tjetër, Kina, megjithë teoritë e paprovuara, ka financuar në mënyrë të konsiderueshme punën në teknologjinë e re, me shumë shpresë në të. Në pesë vjet, midis 2012 dhe 2017, ka investuar më shumë se 1.34 miliardë dollarë në programe të menaxhimit të motit. Agjencia Shtetërore Xinhua njoftoi vitin e kaluar se programet e modifikimit të motit kanë ndihmuar në uljen e sasisë së breshërit me 70 përqind në provincën perëndimore të Xinjiang, ku bujqësia është një nga degët kryesore.
Lojërat kineze me motin kanë krijuar probleme në Indinë fqinje, bujqësia e së cilës varet nga sezoni i musoneve, e cila edhe ashtu është në telashe dhe është bërë i paparashikueshëm për shkak të ndryshimit të klimës. Kjo çështje madje derdhet në territor të pastër politik, pasi shumë besojnë se kjo teknologji mund t'i japë Kinës avantazh në rast të konfliktit në të ardhmen midis dy titanëve fqinjë. Të dy vendet kanë hyrë së fundmi në një konflikt në kufirin e tyre. Dhe për shumë të tjerë, ky program, dhe veçanërisht mungesa e menaxhimit të përbashkët ndërkombëtar, është shumë problematik.
Në fakt, megjithëse Kina e përdor atë për qëllime të brendshme, ai ka një ndikim në vendet fqinje, dhe potencialisht edhe më gjerë. Universiteti Kombëtar i Tajvanit tashmë ka bërë të ditur të jetë "vjedhur shiu" midis rajoneve fqinje. Problemi kryesor këtu është mungesa e një sistemi i "kontrollit dhe frenimit".
- Provat shkencore dhe justifikimet politike për ndryshimin artificial të kohës nuk janë objekt diskutimi në Kinë. Udhëheqja e Kinës pajtohet me përdorimin e teknologjisë për të modifikuar motin dhe pikëpamjet alternative nuk dëgjohen aspak, sipas një raporti nga një universitet tajvanez. Disa ekspertë kanë shprehur shqetësim tashmë për Kinën tepër ambicioze, e cila vuan nga efektet e ndryshimit të klimës, dhe e cila do të zgjidhte të luante me projekte edhe më të mëdha gjeoinxhinierike dhe të zbatonte metoda radikale për të ulur temperaturat me pasoja të panjohura. Kina nuk ka filluar ende projekte të këtij lloji, por për shkak të megapendave të saj dhe projekteve si ky, nuk është e sigurt që nuk do të ndodhë shumë shpejt.
