Udhëheqësit e Koresë së Jugut dhe Japonisë u takuan të dielën për samitin e tyre të dytë në më pak se dy muaj, teksa po përpiqen të ndreqin ankesat historike dhe të forcojnë lidhjet përballë programit bërthamor të Koresë së Veriut dhe sfidave të tjera rajonale.
Kryeministri japonez Fumio Kishida mbërriti në Korenë e Jugut më herët të dielën për një vizitë dyditore, e cila i përgjigjet një udhëtimi në mes të marsit në Tokio nga presidenti i Koresë së Jugut, Yoon Suk Yeol.
Ky ishte shkëmbimi i parë i vizitave ndërmjet liderëve të fqinjëve aziatikë në 12 vjet.
Vëmendja e medias koreano-jugore në samit është përqendruar nëse Kishida do të kërkojë një falje më të drejtpërdrejtë për sundimin kolonial të Japonisë në Gadishullin Korean në vitet 1910-1945.
Komente të tilla nga Kishida ka të ngjarë të ndihmojnë Yoon të fitojë mbështetje më të madhe për shtytjen e tij për të ndërtuar lidhje më të forta me Japoninë dhe për të lehtësuar kritikat e brendshme se ai ka bërë paraprakisht lëshime ndaj Tokios pa marrë hapat përkatës në këmbim, raporton Associated press.
Zyrtarët koreano-jugorë dhe japonezë thanë se liderët e tyre do të diskutojnë programin bërthamor të Koresë së Veriut, sigurinë ekonomike dhe marrëdhëniet e përgjithshme koreano-jugore-japoneze dhe çështje të tjera të paspecifikuara ndërkombëtare.
