Rinor Peci është prej basketbollistëve që po dëshmohet gjithnjë e më shumë dhe si rrjedhojë e kësaj është ftuar edhe në listën e gjerë nga përzgjedhësi i ri i kombëtares së Kosovës, Damir Mulaomeroviç. Megjithatë Peci është i pavendosur për të ardhmen e tij dhe nuk dihet se a do të mbetet apo do të ikë nga klubi me renome Sigal Prishtina. Organizatori i lojës shprehet se nuk do të ngutet, por do të vendos gjatë ditëve në vijim dhe në anën tjetër shprehet i lumtur që është në listën e kombëtares për sfidën kualifikuese të Kampionatit Evropian, kundër Maqedonisë.
“Ndihem mjaft i gëzuar, pasi që të përfaqësosh shtetit tënd është një nder”, tha Peci për gazetën kombëtare “Bota sot”. Basketbollisti tha se është motiv shtesë të jesh pjesë e kombëtares dhe shprehet me optimizëm për përballjen me maqedonët: “Sfida nuk është e lehtë por e kemi përparësinë e terrenit, pasi që tifozët janë të mrekullueshëm”. Më tutje flet edhe për karrierën e tij se a do të mbetet në Sigal Prishtinë apo jo. “Nuk e di, ende nuk kam vendos”, tha ai. Por e pranon se ka oferta, mirëpo ende nuk ka asgjë: “I kam disa oferta, por ende nuk ka kurrgjë konkrete, fatkeqësisht”. Si e sheh basketbollin në vendin tonë, ka rritje të nivelit në përgjithësi? “Në fakt në vitin e kaluar ka pas rënie sipas mendimit tim, por besoj që kthehet niveli”, përgjigjet Peci.
A i frikësoheni konkurrencës së fortë në KB Sigal Prishtina apo kjo iu motivon më shumë? “Jo, nuk i frikësohem vetëm se konkurrenca të shtyn të bëhesh më i mirë”, thotë Peci, ndryshe është djali i ish boksierit të mirënjohur, Xhevdetit. Basketbollisti tha se gjithçka do të shihet në parket sa përket formës së tij: “Besoj se nëse jam në formën më të mirë, mund ta shoh në parket”.
Çfarë premton Rinori? “Gjatë tri viteve kam mësuar nga shumë lojtar e trajnerë dhe pjekuria ime ndaj lojës së basketbollit është rritur, kështu që besoj se këtë vit të kem mundësinë ta paraqes në ndeshje”, përfundoi Peci.