Rusia ka shpallur fitoren në fabrikën e çelikut Azovstal të Mariupolit, pas javësh bombardimesh pothuajse të vazhdueshme mes rezistencës së pabesueshme ukrainase.
Por mbeten shumë pyetje.
Së pari, numri i saktë i luftëtarëve që janë dorëzuar dhe tani janë në territorin e kontrolluar nga Rusia, nuk është ende i qartë. Rusia pretendon se më shumë se 2,000 janë tani në duart e tyre, një numër që nuk është konfirmuar nga Ukraina. Kryqi i Kuq thotë se ka të regjistruar "qindra" të burgosur lufte, por ndryshimi mund të shpjegohet me vonesat në proces, raporton BBC, përcjell Bota sot.
Atëherë, çfarë do të ndodhë me ta? Autoritetet ukrainase kanë sugjeruar se ata do të shkëmbehen me robër lufte rusë, diçka që Moska nuk e ka konfirmuar. Dhe tashmë ka kundërshtim në Rusi për këtë.
Instituti për Studimin e Luftës, një institut me bazë në Uashington, thotë se zyrtarët rusë mund të përpiqen të rrisin numrin e ushtarëve të kapur në mënyrë që të maksimizojnë numrin e të burgosurve rusë që mund të shkëmbehen nëse bihet dakord për një shkëmbim të të burgosurve.
Ndoshta po aq e rëndësishme, ata thonë se “udhëheqja ruse mund të kërkojë gjithashtu të shmangë sikletin e pranimit se forcat e tyre janë bllokuar në një rrethim prej disa muajsh nga “qindra” dhe jo nga “mijëra” mbrojtës ukrainas”.
