LIVE: Luftë e ashpër në Ukrainë, Putin del me paralajmërimin e papritur: Përgjigjemi me shpejtësi rrufe!

Autoritetet ukrainase kanë raportuar se qyteti jugor i vendit, Mykolaiv ka rënë pre i bombardimeve “masive” ruse gjatë natës së kaluar.

Nga sulmi rus i mbrëmshëm, u vra një nga njerëzit më të pasur të Ukrainës, Oleksiy Vadatursky dhe gruaja e tij Raisa, tha guvernatori i zonës.

Kryetari i bashkisë së qytetit i quajti bombardimet “ndoshta më të mëdhatë e të gjitha kohërave”.

Nga bombardimet është shkatërruar një hotel, një kompleks sportiv, dy shkolla dhe një servis, si dhe banesa, raportonBBC.

Mykolaiv është një nga qytetet që të çon në Odesa, porti kryesor i Ukrainës, i cili është goditur vazhdimisht nga ushtria ruse.

Ndërkohë, Rusia ka anuluar festimet e Ditës së Marinës në Krimenë e pushtuar.

Arsyeja e dhënë nga Guvernatori i Sevastopolit Mikhail Razvozhayev ishte një sulm i supozuar me dron ukrainas në selinë e Flotës së Detit të Zi.

Flota ka qenë prej kohësh e bazuar në Sevastopol.

Por një zyrtar i lartë ukrainas, Serhiy Bratchuk, e hodhi poshtë raportin rus si një “provokim”.

Forcat ruse aneksuan Krimenë në vitin 2014.

Ky veprim u dënua ndërkombëtarisht dhe shkaktoi sanksione kundër Rusisë.

Dita e Marinës është një festë vjetore ruse dhe festimet po zhvillohen në të gjithë Rusinë ditën e sotme.

Presidenti Vladimir Putin, tha sot se marina ruse mund të pajiset me raketa hipersonike Zircon brenda muajve të ardhshëm dhe se zona ku do të vendosen do të varet nga interesat ruse.

Duke folur në Ditën e Flotës Ruse në Shën Petersburg, Putin vlerësoi Carin Pjetri i Madh për kthimin e Rusisë në një fuqi të madhe detare. Putin nuk bëri asnjë referencë të drejtpërdrejtë për Ukrainën.

Por presidenti rus tha se kishte nënshkruar një doktrinë të re detare, detajet e së cilës nuk u bënë publike dhe përmendi raketat e lundrimit supersonik Zirconm të cilat cilësohen unike në botë.

“Dorëzimi i këtyre raketave te forcat e armatosura ruse do të fillojë në muajt e ardhshëm”, tha Putin. 

“Fregata Admiral Gorshkov do të jetë e para që do të vihet në modalitet luftarak me këto armë të frikshme.”

“Gjëja kryesore këtu është aftësia e marinës ruse. Ajo është në gjendje t’i përgjigjet me shpejtësi rrufe të gjithë atyre që vendosin të cenojnë sovranitetin dhe lirinë tonë,” shtoi ai.

Rusia ka kryer lëshime të mëparshme testuese të Zircon nga anijet luftarake dhe nëndetëset vitin e kaluar.

Kryeministri i Hungarisë, Viktor Orban ka deklaruar se Bashkimi Evropian (BE) duhet të “ndryshojë strategjinë” në trajtimin e luftës Rusi-Ukrainë dhe të fokusohet në bisedimet e paqes dhe hartimin e propozimeve për paqen në vend që të fitojë.

“Nuk do të ketë paqe pa një ndryshim të strategjisë. Ne nuk mund të zgjidhim asnjë problem pa paqe”, tha Orban, duke folur në një konferencë për media në Vjenë me kancelarin austriak, Karl Nehammer.

Sipas kryeministrit hungarez, Ukraina po lufton kundër Rusisë me mbështetjen e NATO-s dhe lufta nuk mund të fitohet në këtë metodë.

Orban tha se nëse nuk ndërmerren hapa për paqen, BE-ja mund të përballet me një ekonomi lufte.

Lajmin e plotë lexojeni KËTU

Lufta e Rusisë në Ukrainë – e nisur më 24 shkurt – ka lënë dhjetëra-mijëra njerëz të vdekur, ka zhvendosur miliona të tjerë dhe ka nxitur krizë ekonomike në gjithë botën.

Vdekje

Prej nisjes së luftës, 5.237 civilë janë regjistruar si të vrarë dhe 7.035 si të plagosur, ndonëse shifrat aktuale besohet se janë shumë të larta, ka thënë Zyra e Kombeve të Bashkuara për të Drejta të Njeriut më 25 korrik.

Shumica e të vrarëve apo të plagosurve kanë qenë viktima të armëve shpërthyese sikurse, artileria, raketat dhe sulmet ajrore, ka thënë kjo Zyrë.

As Rusia, as Ukraina nuk kanë dhënë detaje për viktimat ushtarake të konfliktit.

Inteligjenca amerikane vlerëson se rreth 15.000 ushtarë rusë janë vrarë deri më tani në Ukrainë dhe numër tre herë më i lartë i ushtarëve janë plagosur.

Lajmin e plotë lexojeni KËTU

Një zyrtar i lartë në Krimenë e aneksuar nga Rusia ka akuzuar Ukrainën për kryerjen e një sulmi me dron në flotën ruse të Detit të Zi.

Guvernatori i Sevastopolit, Mikhail Razvozhayev përmes telegramit tha se një objekt i paidentifikuar fluturoi në oborrin e selisë së flotës.

“Sipas informacioneve paraprake bëhet fjalë për një dron”, ka shkruar ai.

Razvozhayev tha se pesë punonjës të selisë së flotës ishin lënduar në  këtë incident dhe se Shërbimi Federal i Sigurisë po hetonte rastin.

Ai vazhdoi duke thënë se Ukraina kishte vendosur siç u shpreh ai të “prishë Ditën e Marinës për ne”.

Presidenti Volodymyr Zelensky në një fjalim të mbrëmjes së sotme ka urdhëruar evakuimin nga rajoni lindor i Donetskut. Ai ka bërë thirrje gjithashtu që njerëzit që ndodhen ende në zonat luftarake në rajonin më të madh të Donbasit duhet të largohen.

“Sa më shumë njerëz të largohen nga rajoni i Donetsk tani, aq më pak njerëz ushtria ruse do të ketë kohë për të vrarë,” tha ai.

Mediat ukrainase cituan zëvendëskryeministren Iryna Vereshchuk të thoshte se lëvizja e njerëzve duhej të bëhej përpara se të fillojë dimri pasi furnizimet me gaz natyror të rajonit janë shkatërruar.

Zelensky tha se qindra mijëra njerëz  jetojnë ende në zonat e Donbasit ku luftimet ishin të ashpra.

“Shumë refuzojnë të largohen, por ende duhet të bëhet. Nëse keni mundësi, ju lutemi bisedoni me ata që mbeten ende në zonat e luftimit në Donbas. Ju lutemi bindini ata se është e nevojshme të largohen”, tha Zelensky.

Ukraina dhe Rusia kanë shkëmbyer akuza për një sulm raketor që duket se ka vrarë dhjetëra të burgosur ukrainas në qytetin e vijës së parë të Olenivka, të mbajtur nga separatistët e mbështetur nga Rusia në provincën lindore Donetsk.

Në të gjithë Rusinë po formohen batalione vullnetare për të luftuar në Ukrainë, duke iu bashkuar të ashtuquajturit “operacion special ushtarak” i shpallur nga Presidenti Vladimir Putin në shkurt.

Nga Murmansk në Rrethin Arktik në Perm në Urale dhe Primorsky Krai në Lindjen e Largët ruse, bëhet thirrje për patriotizmin, raporton CNN.

Përvoja përkatëse ushtarake nuk kërkohet gjithmonë. Në përgjithësi, analistët vlerësojnë se më shumë se 30,000 vullnetarë mund të mobilizohen për të plotësuar gradat ruse të varfëruara nga pesë muaj luftime.

Javën e kaluar, Richard Moore, shefi i MI6, shërbimi sekret i inteligjencës në Mbretërinë e Bashkuar, i tha Jim Sciutto të CNN se “rusët do ta kenë gjithnjë e më të vështirë të furnizojnë fuqi punëtore, materiale gjatë javëve të ardhshme”.

Putini i ka rezistuar prej kohësh idesë së një mobilizimi të përgjithshëm në Rusi dhe thirrja e kësaj pranvere ishte e ngjashme me atë të vitit 2021. Këto batalione janë një mënyrë për të shtuar fuqinë njerëzore ushtarake të Rusisë pa një hap kaq drastik. Ata gjithashtu duket se janë të fokusuar në rajone më të varfra dhe më të izoluara, duke përdorur joshjen e parave.

Se çfarë ndikimi mund të kenë këto batalione është një pyetje e hapur. Njësitë vullnetare çeçene kanë luajtur një rol të madh në fushatën e Donbasit, veçanërisht në Mariupol. Por ata janë relativisht të pajisur mirë dhe kanë përvojë të gjerë ushtarake. Batalionet që mblidhen diku tjetër, është e qartë se jo.

Kateryna Stepanenko, studiuese ruse në Institutin për Studimin e Luftës në Uashington, thotë: “Disa batalione do të marrin pjesë ekskluzivisht në mbështetje luftarake dhe operacione mbështetëse luftarake (të tilla si batalione logjistike ose sinjalizuese), ndërsa të tjerët do të përforcojnë njësitë ushtarake para-ekzistuese ose formojnë batalione luftarake”.

“Trajnimi afatshkurtër nuk ka gjasa t’i kthejë vullnetarët pa përvojë paraprake në ushtarë efektivë në çdo njësi”, shton ajo.

CNN ka kërkuar koment nga Ministria ruse e Mbrojtjes për programin e batalionit vullnetar.

Ukraina dhe Rusia kanë shkëmbyer akuza mes tyre për një sulm raketor që ka vrarë dhjetëra të burgosur ukrainas në rajonin lindor të Donetskut.

Ministria ruse e mbrojtjes publikoi një listë të të burgosurve ukrainas të luftës për të cilët tha se u vranë dhe u plagosën në atë që tha se ishte një sulm raketor nga ushtria ukrainase.

Ai tha se sulmi nga raketat Himars të prodhuara nga SHBA kishte vrarë 50 të burgosur dhe plagosur 73 të tjerë, raporton Reuters.

Forcat e armatosura të Ukrainës mohuan përgjegjësinë, duke thënë se artileria ruse kishte shënjestruar burgun për të fshehur keqtrajtimin e atyre që mbaheshin atje.

Sekretari amerikan i Shtetit, Antony Blinken, shprehu ngushëllimet e tij për vdekjet në një telefonatë me ministrin e Jashtëm të Ukrainës, Dmytro Kuleba, sipas një deklarate të Departamentit të Shtetit. Shtetet e Bashkuara janë të përkushtuara që të “bëjnë përgjegjës Rusinë për mizoritë e kryera nga forcat e saj kundër popullit të Ukrainës”, tha Blinken. Kombet e Bashkuara janë të gatshme të dërgojnë një grup ekspertësh në Olenivka për të hetuar incidentin, nëse merr pëlqimin nga të dyja palët, tha zëdhënësi i OKB-së Farhan Haq.