Presidenti i Ukrainës, Volodymyr Zelensky është përfshirë në një aksident automobilistik teksa kthehej nga Iziumi për në Kiev.
Sipas zyrtarëve ukrainas, Zelensky është në gjendje të mirë, ndërsa së fundi mësohet se një burrë ka mbetur i plagosur.
Në pamjet e publikuara nga Daily Mail shihet një burrë me kokën të gjakosur, duke u fashuar, ndërsa mbi të vendosin një batanije termike.
Duket se makina në video po shkonte drejt perëndimit nga Kievi kur u godit në pjesën e përparme në anën e shoferit.
Pjesa e përparme e makinës është e shtypur me rrotën e përkulur poshtë shasisë, ndërsa airbagu i shoferit është hapur.
As Zelensky dhe as kolona e tij e automjeteve nuk janë të dukshme në pamje.
Lajmi për aksidentin tronditi ukrainasit, ndërsa Rusia sulmon në mënyra gjithnjë e më të dëshpëruara pas humbjeve të saj të fundit në fushën e betejës pranë Kharkiv.
Zelensky i mbijetoi tentativave të shumta për ta vrarë në ditët e para të luftës, por ka ekzistuar në një siguri relative që kur Rusia u tërhoq nga Kievi muaj më parë.
Nëse ai do të lëndohej rëndë në këtë fazë të luftimeve, do të ishte një moment jashtëzakonisht simbolik me efekte të paparashikueshme në moralin ukrainas.
