Një gjykatë e BE-së ka hequr sanksionet kundër nënës së liderit mercenar rus Yevgeny Prigozhin, duke argumentuar se lidhja familjare nuk ishte e mjaftueshme për ta shënjestruar atë.
Violetta Prigozhina kishte apeluar në Gjykatën e Përgjithshme të Luksemburgut pasi u fut në listën e sanksioneve të BE-së në shkurt të vitit 2022, në prag të pushtimit rus të Ukrainës.
Ajo fitoi apelin e saj të mërkurën pasi gjyqtarët arritën në përfundimin se këshilli i ministrave të BE-së, organi vendimmarrës, nuk kishte treguar se ajo zotëronte ndonjë kompani me lidhje me djalin e saj, shkruan The Guardian.
Yevgeny Prigozhin, themeluesi i grupit mercenar rus Wagner dhe një nga bashkëpunëtorët më të ngushtë të Vladimir Putinit, u fut në listën e sanksioneve të BE-së në vitin 2020 për veprat e tij në financimin e luftëtarëve rusë në Libi, të cilët kryen shkelje të të drejtave të njeriut.
Këshilli i BE-së shtoi nënën e tij, Violetta, në listën e sanksioneve, duke e emëruar atë si pronare të Concord Management and Consulting Group, pjesë e Concord Group, e themeluar dhe në pronësi të djalit të saj deri në vitin 2019.
Thuhej se ajo zotëronte kompani të tjera në lidhje me djalin e saj, i cili kishte përfituar nga kontratat e ministrisë ruse të mbrojtjes pas pushtimit rus të Krimesë dhe pushtimit të Ukrainës lindore nga separatistët e mbështetur nga Rusia.
Duke dhënë vendimin e saj të mërkurën, gjykata e përgjithshme tha se Prigozhina nuk kishte qenë pronare e Concord Management and Consulting që nga viti 2017 dhe autoritetet e BE-së nuk kishin arritur të demonstronin se ajo zotëronte biznese të tjera me lidhje me djalin e saj në kohën e shtimit të saj në listën e sanksioneve.
Vetëm marrëdhënia familjare, vazhdoi aktgjykimi “nuk mjafton për të justifikuar përfshirjen e saj në listat e kontestuara”.
Që nga aneksimi i Krimesë nga Rusia në vitin 2014, BE-ja ka vendosur sanksione ndaj 1,473 individëve dhe 205 organizatave, duke përfshirë presidentin rus, rrethin e tij të ngushtë dhe udhëheqësit e lartë ushtarakë.
Të qenit në listën e sanksioneve do të thotë që një individ nuk mund të udhëtojë në BE dhe të gjitha pasuritë e tij që kanë në Union janë të ngrira.
