Presidenti bullgar Rumen Radev raportoi të shtunën se Kompania Shtetërore e Naftës e Republikës së Azerbajxhanit (SOCAR) do të hapë një zyrë në Bullgari në maj 2023. Radev mbajti një videokonferencë në Baku me homologun e tij nga Azerbajxhani, Ilham Aliyev, pasi Radev rezultoi pozitiv me COVID-19.
Sipas Radev, zyra e SOCAR-it në Bullgari është shenjë e synimeve serioze të Azerbajxhanit për thellimin e mëtejshëm të bashkëpunimit ndërmjet dy vendeve në sektorin energjetik.
Pala azere tregoi interes për projektin e Unazës së Solidaritetit (String), i cili do të bashkojë kapacitetet e rrjeteve të transmetimit të gazit të Bullgarisë, Greqisë, Rumanisë, Sllovakisë dhe Hungarisë për të krijuar diversifikim real të energjisë. Radev ftoi homologun e tij azer në Sofje, ku të dy mund të diskutojnë për anëtarësimin e Azerbajxhanit në projekt, i cili është plotësisht në përputhje me vizionin evropian për garantimin e furnizimeve, sigurinë dhe diversifikimin e tyre.
"Ne tashmë po marrim sasitë e plota të gazit azerbajxhanas përmes interkonjektorit midis Greqisë dhe Bullgarisë në kushte shumë të mira, por ky është vetëm fillimi", tha Radev.
Ai theksoi se dialogu politik në nivelin më të lartë është kusht i rëndësishëm për thellimin e bashkëpunimit mes dy vendeve në të gjitha fushat me interes të ndërsjellë, jo vetëm energjetik.
