Presidenti i Iranit, Ebrahim Raisi, tha të martën se vendi i tij kurrë nuk do të heqë dorë nga e drejta e tij “për të pasur energji bërthamore paqësore” dhe u kërkoi Shteteve të Bashkuara “të demonstrojnë në një mënyrë të verifikueshme” se duan të kthehen në marrëveshjen bërthamore të 2015-ës.
Duke iu drejtuar takimit vjetor të nivelit të lartë të Asamblesë së Përgjithshme të OKB-së, Raisi tha se tërheqja amerikane nga marrëveshja shkeli angazhimet e ShBA-së dhe ishte “një përgjigje e papërshtatshme” ndaj përmbushjes së angazhimeve nga Irani, raporton AP..
Presidenti i atëhershëm Donald Trump tërhoqi në mënyrë të njëanshme ShBA-në nga marrëveshja në vitin 2018, duke rivendosur sanksionet gjymtuese.
Irani filloi të shkelte kushtet një vit më vonë dhe bisedimet zyrtare në Vjenë për të rifilluar marrëveshjen dështuan në gusht 2022.
Irani ka mohuar prej kohësh se ka kërkuar ndonjëherë armë bërthamore dhe vazhdon të këmbëngulë se programi i tij është tërësisht për qëllime paqësore.
Por shefi bërthamor i OKB-së, Rafael Grossi, tha në një intervistë të hënën me Associated Press se heqja nga qeveria iraniane e shumë kamerave dhe sistemeve elektronike të monitorimit të instaluara nga Agjencia Ndërkombëtare e Energjisë Atomike e bën të pamundur dhënien e garancive për programin bërthamor të vendit. Grossi ka paralajmëruar më parë se Teherani ka mjaft uranium të pasuruar për “disa” bomba bërthamore nëse vendos t’i ndërtojë ato.
