Sipas ushtrisë siriane, sulmet e SHBA-së që shënjestruan pjesë të Sirisë vonë të premten vranë civilë dhe personel ushtarak dhe shkaktuan “dëme të konsiderueshme”.
“(Shtetet e Bashkuara) nisën një agresion ajror flagrant kundër një numri vendesh dhe qytetesh në rajonin lindor të Sirisë, dhe afër kufirit Sirian-Irak, që çoi në martirizimin e një numri civilësh dhe ushtarësh, plagosjen e të tjerëve, dhe shkaktimin e dëmeve të konsiderueshme në pronën publike dhe private”, tha Ministria e Mbrojtjes siriane në një deklaratë herët të shtunën.
Numri i viktimave, nuk është verifikuar ende në mënyrë të pavarur, raporton CNN.
Më herët të premten, gjenerallejtënant Douglas Sims, drejtori i operacioneve për Shefat e Përbashkët të Shtabit, tha se do të “mund të ketë viktima” nga sulmet në Siri dhe Irak.
Agjencia shtetërore e lajmeve siriane SANA raportoi se sulmet ajrore goditën zonat e Deir Ezzor, Al-Bukamal dhe Al-Mayadeen si dhe rrethinat e tyre në kufirin Sirian-Irak.
SHBA-ja tha se kreu sulme të mëdha ajrore në 85 objektiva në shtatë vendndodhje në Irak dhe Siri të premten në përgjigje të një sulmi me dron nga luftëtarët për të cilët thuhet se janë të mbështetur nga Irani në një post ushtarak amerikan në Jordani të dielën, i cili vrau tre anëtarë të shërbimit amerikan dhe plagosi më shumë se 40 të tjerë.
