LIVE: Dështojnë bisedimet për armëpushim - Hamasi thotë se snajperët izraelitë vranë tre palestinezë në spital

Bisedimet që përfshinin SHBA-në, Egjiptin, Izraelin dhe Katarin përfunduan sot pa rezultat.

Presidenti egjiptian Abdel Fattah al Sisi zhvilloi një takim me drejtorin e CIA-s, William Burns dhe kryeministrin e Katarit, Sheikh Mohammed bin Abdulrahman bin Jassim Al-Thani, me qëllim arritjen e marrëveshjes për një armëpushim.

Më pas, një deklaratë e shërbimit shtetëror të informacionit egjiptian përmendi një "gatishmëri për të vazhduar konsultimin dhe koordinimin" mbi çështjet kryesore, duke sugjeruar se nuk ishte bërë ndonjë përparim.

Një zyrtar palestinez tha se palët po kërkonin një formulë të pranueshme për Hamasin.

Një zyrtar i Hamasit tha se grupi u tha pjesëmarrësve se nuk beson që Izraeli nuk do të ripërtërijë luftën nëse pengjet izraelitë që ai mban lirohen.

Delegacioni izraelit u largua nga Kajro për në shtëpi, tha një gazetar i Reuters. Zyra e kryeministrit izraelit nuk iu përgjigj menjëherë një kërkese për koment.

Egjipti ka rritur sigurinë në kufirin e tij me Gazën në perspektivën e një ofensive izraelite në Rafah, sipas raporteve.

Trupat dhe makineritë janë vendosur në Sinain e Veriut si pjesë e fortifikimit, thanë zyrtarët egjiptianë të sigurisë për CNN.

Ata thanë se masat ishin "paraprake".

Zhvillimi i fundit vjen pasi zyrtarët egjiptianë thanë se vendi po kërcënonte të pezullonte marrëveshjen e tij të paqes me Izraelin.

Marrëveshja historike e vitit 1979, e bazuar në Marrëveshjet e Camp David-it një vit më parë, pa që Izraeli të tërhiqej nga Gadishulli Sinai dhe të vendosen kufizime në forcat që Egjipti mund të dislokonte në zonë.

Ministria e shëndetësisë e Gazës e drejtuar nga Hamasi ka thënë se snajperët izraelitë kanë vrarë tre palestinezë brenda kompleksit mjekësor Nasser.

10 persona të tjerë u plagosën, tha zëdhënësi Dr Ashraf al Qudra.

Sky News nuk mund të verifikojë në mënyrë të pavarur këto raporte.

Presidenti Joe Biden tha të hënën se Shtetet e Bashkuara po kërkojnë një pauzë gjashtë-javore në luftimet midis Izraelit dhe Hamasit në Gazë, si një hap drejt një armëpushimi më afatgjatë.

Zoti Biden dhe Mbreti Abdullah i Jordanisë folën për median pasi dy aleatët mbajtën bisedime në Shtëpinë e Bardhë që prekën një numër çështjesh, përfshirë një ofensivë të pritshme izraelite nga toka në Gazën jugore dhe rrezikun e një fatkeqësie humanitare mes civilëve palestinezë.

Presidenti Biden, i cili ka shfaqur pakënaqësi në rritje me kryeministrin izraelit Benjamin Netanyahu lidhur me ofensivën në Gazë, tha se Shtetet e Bashkuara po punojnë me aleatët në rajon për një marrëveshje për ndaljen e luftimeve për të lejuar lirimin e pengjeve të Gazës dhe rrjedhën në rritje të ndihmës humanitare.

Marrëveshja do të parashikonte një pauzë në luftime prej të paktën gjashtë javësh, "gjatë të cilave mund të punohet për të ndërtuar diçka më të qëndrueshme," tha zoti Biden.

Mbreti Abdullah ripërsëriti thirrjen për një armëpushim të gjerë.

“Ne nuk mund të lejojmë që kjo të vazhdojë”, tha ai. "Kemi nevojë për një armëpushim të qëndrueshëm tani. Kjo luftë duhet të përfundojë."

Presidenti Biden ka intensifikuar thirrjet që Izraeli të mos ndërmarrë një ofensivë tokësore në qytetin jugor të Gazës, Rafah, pa një plan për të mbrojtur civilët palestinezë.

Zoti Biden foli me kryeministrin Netanyahu të dielën dhe Shtëpia e Bardhë tha se ai theksoi se "nuk duhet të ndërmerret një operacion ushtarak në Rafah pa një plan të besueshëm dhe të zbatueshëm për të garantuar sigurinë dhe mbështetjen për më shumë se një milion njerëz të strehuar atje".

Ekipi i zotit Biden është përpjekur të negociojë një pauzë në luftime për të siguruar lirimin e pengjeve të mbajtura nga Hamasi që kur grupi militant palestinez që qeveris Gazën nisi një sulm në jug të Izraelit më 7 tetor, duke vrarë 1200 njerëz. Ministria e Shëndetësisë e kontrolluar nga Hamasi në Gazë thotë se më shumë se 28,000 njerëz janë vrarë në Gazë në ofensivën e Izraelit kundër luftëtarëve të Hamasit./VOA

Një gjykatë apeli në Holandë urdhëroi të hënën qeverinë të ndalojë eksportet e pjesëve të avionëve luftarakë F-35 në Izrael, pas një padie të ngritur nga grupet e të drejtave të njeriut që ngritën shqetësime për ofensivën e Izraelit në Rripin e Gazës.

“Është e pamohueshme se ekziston një rrezik i qartë që pjesët e eksportuara të avionëve F-35 të përdoren për shkelje të rënda të ligjit ndërkombëtar humanitar”, tha gjykata.

Izraeli ka mohuar kryerjen e krimeve të luftës në Gazë, ku nisi një operacion ushtarak kundër grupit militant Hamas pas sulmit terrorist të tyre në tetor që vrau 1200 njerëz në pjesën jugore të Izraelit, sipas të dhënave izraelite. Përgjigja ushtarake izraelite ka vrarë më shumë se 28,300 palestinezë, sipas ministrisë së shëndetësisë të drejtuar nga Hamasi në Gazë, të dhëna që nuk janë konfirmuar nga burime të pavarura.

Gjykata holandeze tha se qeveria duhet të nisë së zbatojë vendimin brenda shtatë ditëve.

Vendimi mund të apelohet.

Holanda ka një depo të pjesëve për aeroplanët F-35, prodhim amerikan, që eksportohen në disa vende.

Disa informacione për këtë artikull u morën nga agjencitë ‘Associated Press’, ‘Agence France-Presse’ dhe ‘Reuters’.