ISIS ka ekzekutuar të paktën 232 persona në qytetin irakian të Mosulit e po përdor mijëra të tjerë si mburoja njerëzore kundër forcave irakiane që po i afrohen gjithnjë e më shumë bastionit të tyre të fundit.
Vrasja masive e atyre që nuk u ishin bindur urdhërave të grupit u kryen të mërkurën, sipas Agjencisë për Dretjat e Njeriut të OKB-së. Rreziqet e mëdha me të cilat përballen të paktën 1 milionë njerëzit e bllokuar në Mosul, konfirmohen edhe nga vetë banorët. Ahmed Saleh dhe familja e tij jetojnë në Qayyarah, një qytezë e pasur me naftë, 60 km në jug të Mosulit. Edhe pse beteja atje mbaroi rreth 2 muaj më parë, kolonat e tymit të zi që ngrihen nga puset, dëshmojnë terrorin e luftës, siç thotë ky person.
“Ekstremistët erdhën në shtëpinë time me raketahedhëse, murtaja dhe armë të tjerë. Qëndruan për 4 orë, 5 orë për sulmet e më pas u larguan. Fëmijët dhe gruaja ime gjendeshin atje kur hapën zjarr. U tmerruam”.
Në gusht, xhihadistët u fshehën nëpër banesa, pasi dështuan në parandalimin e avancimit të forcave qeveritare në Qayyarah. Pikërisht atëherë, sipas Saleh, filluan t’i përdornin qytetarët si mburoja njerëzore.
“Ata pozicionuan artilerinë këtu. U thashë se kishte shumë të mitur e të moshuar, por ekstremistët i shpërfillën kërkesat e mia. Donin t’i shmangeshin zjarrit të forcave të sigurisë e sulmeve ajrore e na përdorën ne si mburoja”, thotë Ahmed.
Familja e tij u çlirua nga ekstremistët pas dy ditësh bombardime intensive të trupave irakiane në qendër të qytetit. Forcat irakiane të mbështetura nga trupa aleatë dhe koalicioni i drejtuar nga Amerika po ndërmarrin një ofensivë të shkallës së gjërë për çlirimin e Mosulit nga ekstremistët.
