Presidenti amerikan, Donald Trump, ka thënë gjatë ditës së sotme se bisedimet në mes të Koresë Veriore dhe Koresë Jugore janë shenjë se Pheniani është duke u ndikuar nga sanksionet që i janë vënë, pas testimeve të raketave balistike dhe armëve bërthamore, transmeton Reuters.
“Sanksionet dhe ‘presionet’ e tjera kanë filluar të kenë ndikim të madhe tek Koreja Veriore. Ushtarët janë duke ikur me rrezik drejt Korese Jugore”, ka thënë Trump përmes një postimi në Twitter.
“Njeriu i raketave tani dëshiron të bisedojë me Korenë Jugore për herë të parë. Ndoshta ky është lajm i mirë, ndoshta jo, do të shohim”, ka thënë presidenti Trump.
Këto reagime të Trumpit kanë ardhur pas deklaratave të liderit verikorean, Kim Jong Un se ka mundësi për zhvillimin e bisedimeve në mes të dy vendeve për të diskutuar pjesëmarrjen e një ekipi të Koresë Veriore në Lojërat Olimpike Dimërore që nisin muajin tjetër në Pieonçang.
