Shefi rus i diplomacisë, Sergei Lavrov theksoi sot se marrëveshja bërthamore iraniane nuk mund të mbijetojë nëse SHBA-të tërhiqen, sikurse kërcënoi të bëjë Donald Trump.
“Kjo marrëveshje nuk mund të aplikohet nëse një prej pjesëmarrësve vendos të dalë në mënyrë të njëanshme”, deklaroi Lavrov gjatë një konference për shtyp në selinë e OKB-së në Nju Jork.
“Do të shpërbëhet dhe nuk do të ketë më marrëveshje. Besoj se të gjithë e kuptojnë këtë”, theksoi ministri rus.
Më 12 janar, presidenti amerikan i kërkoi evropianëve që të ndihmojnë në korigjimin e hapësirave të tekstit, në të kundërt SHBA-të do të rikthejnë sanksionet e lidhura me bërthamoren iraniane dhe do të dalë de facto nga pakti i arritur në vitin 2015 në Vjenë me fuqitë e tjera Kinën, Rusinë, Francën, Gjermaninë, Britaninë e Madhe dhe Iranin.
“Bëhet fjalë për një çast vendimtar”, vazhdoi Lavrov, duke bërë të qartë se Moska nuk do të përpiqet të shpëtojë marrëveshjen me partnerët që mbeten, por do të bëjë gjithçka që të bindë amerikanët të mos tërhiqen.
Diplomati theksoi gjithashtu se një dalje nga marrëveshja iraniane, do të dërgonte një mesazh të keq për Korenë e Veriut, që posedon bombën atomike dhe se anëtarët e Këshillit të Sigurimit po përpiqen ta bindin që ta braktisë.
