Çiklisti italian Michele Gazzara ka fituar edicionin e 75-të të turit Çiklistik të Shqipërisë, triumfi i parë i tij në turneun shqiptar të biçikletës. Suksesi që çiklisti i skuadrës Sangemini korri në etapën e parë (Tiranë-Korçë), praktikisht vulosi fitoren e Turit, pasi italiani krijoi një shkëputje të ndjeshme ndaj rivalëve dhe në 4 etapat e tjera e administroi mirë atë. Kjo edhe falë një pune më të mirë në grup që bëri ekipi i tij Sangemini, që korri edhe vendin e parë si skuadër.
Sot u zhvillua etapa e 5-të dhe e fundit e Turit të 75-të Çiklistik të Shqipërisë, Sarandë-Fier, 162,5km e gjatë, një etapë mikse, me malore në pjesën e saj të parë, por pas Qafës së Muzinës për çiklistët nisi një dishezë e fortë dhe në fund terreni fushor, deri në Fier. Çiklistët pothuajse garuan në grup gjatë gjithë kohës, me Gazzara dhe skuadrën e tij që kontrollonte rivalët, duke bërë një paraqitje të mirë.
Fitues i kësaj etapë doli irlandezi Marc Heaney, që mbërriti në finish pas 4h04’49”. Ai fitoi duelin e shpejtësisë me shqiptarin Xhuliano Kamberaj (i dyti) dhe italiani Riccardo Stancchiotti (i treti). mirë u paraqit edhe Iltjan Nika, që u klasifikua në vendin e shtatë, ndërsa Gazzara i 25-ti, por me të njëjtën kohë si dhe fituesi.
Në përfundim të kësaj etape, Michele Gazzara u shpall fitues i turit të 75-të Çiklistik, duke lënë pas patriotin e tij dhe shokun e tij të skuadrës Sangemini, Nicola Gaffurini me 1 minutë më shumë, ndërsa i treti u klasifikua kroati Brouno Maltar. I pari nga çiklistët kuqezi në këtë renditje të përgjithshme është Ridion Kopshti, në vendin e 29-të, por shumë larg kreut, duke bërë që çiklistët shqiptarë të mos shkëlqejnë në këtë turne edhe pse fituan një etapë (të tretën) me Kamberajn.
Turi Çiklistik – Etapa e pestë (Sarandë-Fier, 162,5km)
1-Marc Heaney (Irlandë) Asfra Racing 4h04’49”
2-Xhuliano Kamberaj (Shqipëri) Shqipëria “
3-Riccardo Stancchiotti (Itali) Mstina Focus “
Renditja Përfundimtare
1-Michele Gazzara (Itali) Sangemini 19h56’36”
2-Nicola Gaffurini (Itali) Sangemini +1’01”
3-Bruno Maltar (Kroaci) Meridiana +1’51”
Renditja ekipore
1-Sangemini 59h54’19”
2-Meridana 60h00’30”
3-Project D’Azur 60h06’29”