Rreth 169 anije me mbi 97 mije konteinere janë përpunuar në portin e Durrësit në 10 mujorin e këtij viti.
Sipas të dhënave të Sektorit të Statistikave të Autoritetit Portual Durrës (APD), gjatë muajve janar-tetor, janë përpunuar 97.059 konteinerë ose 1.793 më shumë se sa 10-mujori i parë i vitit 2016.
Në portin e Durrësit janë transportuar më shumë se 1.2 milion ton mallra të ndryshme gjithsej. Raporti mes eksporteve dhe importeve në mallra me konteinerë për këto 10 muaj është 50,13% – 49,87%.
Eksportet dhe importet, janë thuajse të barabarta për nga numri i përpunuar në kalatën 6 të portit, ku ndodhet Teminali përkatës.
Nga statistikat mësohet gjithashtu se numri më i madh i konteinerëve është përpunuar në muajt korrik dhe shtator përkatësisht me 11.511 dhe 11.463 gjithsej. Sasia e përpunuar në këto dy muaj është përkatësisht 165.499 ton dhe 145.433 ton.