Hamza nënshkruan memorandum me BERZH me vlerë 100 milionë euro

Ekonomi

Hamza nënshkruan memorandum me BERZH me vlerë 100 milionë euro

Më: 8 maj 2018 Në ora: 14:17
Nënshkrimi i Memorandumit të Bashkëpunimit për Infrastrukturë Lokale dhe Mjedis

Delegacioni i Kosovës, i kryesuar nga ministri i Financave Bedri Hamza është duke marrë pjesë në takimet vjetore të organizuara nga Banka Evropiane për Rindërtim dhe Zhvillim (BERZH) të cilat po mbahen në Aman të Jordanisë.

Gjatë këtij takimi është nënshkruar edhe Memorandumi i Bashkëpunimit për Infrastrukturë Lokale dhe Mjedis i cili parasheh bashkëpunimin afatshkurtër mes dy institucioneve për projekte në komunat e Kosovës, në vlerë totale deri në 100 milionë euro.

Memorandumi shërben si kërkesë fillestare për financim nga Ministria e Financave të Kosovës për projekte në sektorë kyç të infrastrukturës lokale, siç janë ujërat dhe trajtimi i ujërave të zeza, menaxhimi i mbeturinave të ngurta, ngrohja qendrore, transporti, infrastruktura rrugore, dhe efiçienca e energjisë.

Nënshkrimi i këtij memorandumi rithekson zotimin e Ministrisë së Financave për të siguruar financim për projekte të nivelit lokal, të cilat janë të rëndësisë së veçantë për përmirësimin e kualitetit të jetës së qytetarëve të Kosovës.  

Sipas kumtesës dërguar mediave nga ministria, gjatë këtyre takimeve Ministri Hamza është pritur në takim të veçantë nga Presidenti i BERZH-it, Suma Chakrabarti, për të diskutuar mbi bashkëpunimin financiar mes BERZH-it dhe Ministrisë së Financave, përkatësisht Qeverisë së Kosovës.

Ministri Hamza kërkoi që përveç aktivitetit aktual, Banka të zgjerojë mbështetjen për sektorin privat, në veçanti për mbështetjen e bizneseve të reja që udhëhiqen nga të rinjtë dhe gratë. 

Sot mund të lexoni Shfletoni kopertinat