Rritet deficiti tregtar për gusht, bie eksporti me vendet e CEFTA-s

Ekonomi

Rritet deficiti tregtar për gusht, bie eksporti me vendet e CEFTA-s

Më: 24 shtator 2018 Në ora: 15:47
Foto ilustrim

Të dhënat nga tregtia e jashtme në Kosovë tregojnë për një deficit tregtar më të lartë për 4.5% në muajin gusht 2018, në raport me periudhën e njëjtë të vitit 2017, gjegjësisht në vlerë prej 276,5 milionë euro, krahasuar me deficitin prej 264,6 milionë në vitin 2017, ndërkohë që eksporti mbulon importin me 9.9 për qind.

Kjo është bërë e ditur në raportin e publikuar sot nga Agjencia e Statistikave të Kosovës (ASK) lidhur me rrjedhat e eksportit dhe importit për muajin gusht të këtij viti.

Eksporti i mallrave në gusht 2018 kishte vlerën 30,4 milionë euro, ndërsa importi 307 milionë euro, që është një rënie prej -6.5% për eksport dhe rritje prej 3.3% për import, duke krahasuar me periudhën e njëjtë të vitit 2017. 

Sipas të dhënave të grupeve kryesore të eksportit 24.9% të eksporteve e përbëjnë metalet bazë dhe artikujt prej tyre, 17.4%  produktet minerale, 15% ushqimet e përgatitura, pijet dhe duhani, 12% plastika, goma dhe artikujt prej tyre, etj.

Ndërsa, sipas të dhënave të grupeve kryesore për import 17.1% e përbëjnë produktet minerale, 14.3% ushqimet e përgatitura, pijet dhe duhani, 12% metalet bazë dhe artikujt prej tyre, 10.6%  makineritë, pajisjet mekanike dhe elektrike, etj.

Eksportet e Kosovës në vendet e BE-së arritën në 10,5 milionë euro, ose rreth 34.5%, me një rritje prej 31.4%. Partnerët kryesorë për eksportin e mallrave janë Gjermania me 7.2%, Sllovenia 5.5%, Britania e Madhe 4.7%, Holanda 3.6% etj.

Ndërsa, importet e Kosovës nga vendet e BE-së ishin rreth 128,2 milionë euro ose 41.8% me një rritje prej 5%. Importet me pjesëmarrje më të lartë ishin nga Gjermania me 11.1%, Italia 6.5%, Rumania 4.1%, Greqia 3.3%, Polonia 3.2 etj.

Në gusht, eksportet e Kosovës me vendet CEFTA-s arritën në 15,4 milionë euro ose 50.6%, me një rënie prej -6.2%. Partnerë kryesorë për eksport nga vendet e CEFTA-s janë Shqipëria me 19.8%, Serbia 11.5%, Maqedonia 11.1% dhe Mali i Zi 6.2%. 

Ndërsa, importet nga vendet e CEFTA-s në këtë periudhë arritën në 90,6 milionë euro, ose 29.5%, me një rritje prej 4.2%. Vendet me pjesëmarrje më të lartë për import ishin Serbia 14%, Shqipëria 7.2%, Maqedonia 5.5% dhe Bosnja e Hercegovina 2.4%.

Eksportet e Kosovës me vendet e tjera të botës arritën në 4,5 milionë euro, ose 14.9%, ndërsa partnerë kryesorë është Zvicra me 9.6 për qind.  Ndërsa, importet e Kosovës me vendet e tjera të botës arritën në 88 milionë ose 28.7%. Vendet me pjesëmarrje më të lartë për import janë Turqia me 9% dhe Kina 8.8 për qind.

Sot mund të lexoni Shfletoni kopertinat