Një person është vrarë dhe tre të tjerë janë plagosur në një sulm raketor rus në Ukrainë më 1 shtator. Sulmi erdhi në kohën kur Rusia raportoi për më shumë sulme me dronë, përfshirë edhe një afër kryeqytetit dhe afrë një centrali bërthamor.
Një burrë u vra nga granatimet ruse në qytetin jugor ukrainas të Hersonit, njoftoi administrata ushtarake në këtë rajon.
Tre persona u plagosën kur një kompani private u godit nga një raketë lundruese me rreze të gjatë veprimi në qytetin Vinitsja, tha guvernatori Serhiy Borozov përmes një postimi në aplikacionin Telegram, raporton REL.
Komanda e Forcave Ajrore të Ukrainës tha se rrëzoi një raketë të dytë të lëshuar si pjesë e sulmit gjatë natës. Raketa u rrëzua mbi rajonin qendror Kirovohrad, tha guvernatori lokal në Telegram.
Më herët, kryetari i Moskës, Sergei Sobyanin, tha se sistemet mbrojtëse ajrore i kanë rrëzuar dy dronë për të cilët tha se po i afroheshin qytetit. Dronët u rrëzuan në jug të Moskës, shkroi ai në Telegram.
Agjencia shtetërore e lajmeve e Rusisë, TASS, raportoi se fluturimet u pezulluan përkohësisht të premten në tri aeroportet më të mëdha të Moskës, Sheremetyevo, Domodedovo, and Vnukovo.
Ka pasur pengesa të vazhdueshme në nisje dhe ulje të aeroplanëve në aeroportet e Moskës në kohët e fundit, për shkak të rrezikut nga dronët.
Një sulm me dron u raportua edhe në Kurçatov, afër një centrali bërthamor në rajonin Kursk, tha guvernatori rajonal Roman Starovoit.
Shërbimet emergjente shkuan në vendin e ngjarjes për t’i vlerësuar dëmet në një ndërtesë administrative dhe në një ndërtesë banimi si pasojë e sulmit, tha ai.
Starovoit nuk përmendi ndonjë dëm të mundshëm në centralin bërthamor të Kurskit, e as nuk dha hollësi për ndërtesat e goditura.
Më herët, një guvernator lokal në rajonin perëndimor, Pskov, tha se mbrojtja ajrore ruse e kishte “neutralizuar një objekt të paidentifikuar”.
Rajoni Pskov, rreth 700 kilometra në veri të kufirit ukrainas, ishte cak i një sulmi të madh me dronë në fillim të kësaj jave. Dronët e goditën një aeroport duke e shkaktuar një zjarr masiv dhe duke i dëmtuar katër aeroplanë transportues il-76, njoftoi TASS më 30 gusht, duke cituar zyrtarët rusë.
Presidenti i Ukrainës, Volodymyr Zelensky, tha më 31 gusht se Ukraina e ka zhvilluar një armë e cila është në gjendje ta godasë cakun 700 kilometra larg, duke iu referuar sulmi në aeroportin e Pskovit.
Zelensky tha se arma u prodhua nga Ministria e Industrive Strategjike e Ukrainës, por nuk dha hollësi të tjera.
Ndërkohë, Shtabi i Përgjithshëm i Forcave të Armatosura të Ukrainës tha se më shumë se 25 beteja u zhvilluan në vijën e frontit në 24 orët e fundit.
Në raportin e vet ditor më 1 shtator, ushtria ukrainase tha se forcat e saj “po vazhdojnë të kryejnë operacione në drejtim të Melitopolit”.
Qëkur e nisi kundërofensivën, Ukraina i ka çliruar më shumë se dhjetëra fshatra, por ende nuk ka arritur të depërtojë në mbrojtjet kryesore të Rusisë.
