David Kozak, autori i masakrës me armë të së enjtes në Universitetin Karl të Pragës është autor edhe i një tjetër masakre, asaj të 15 Dhjetorit në një pyll pranë kryeqytetit çek, ku një 32-vjeçar dhe e bija 2-muajshe u gjetën të vrarë me armë.
Hetuesit çekë vërtetuan dyshimet pasi gjatë kontrollit në shtëpinë e Kozakut, gjetën armën e përdorur për kryerjen e krimit makabër. Vrasja e 32-vjeçarit dhe foshnjës së tij ishte nën hetim, pasi deri para masakrës së të enjtes nuk gjendej arma e krimit, apo gjurmë të tjera që mund të hidhnin dritë mbi autorin.
Në bodrumin e shtëpisë së autorit 24-vjeçar ku u gjet arma e masakrës së parë të tij të 15 Dhjetorit, u zbulua edhe trupi i pajetë i të atit të cilin ai e ekzekutoi para se të kryente sulmin në Universitetin e Pragës, po ashtu edhe një një sasi e madhe lëndësh shpërthyese, prej të cilëve po bënte bomba artizanale. David Kozak vrau 14 persona, plagosi 25 të tjerë dhe u vetëvra në Universitetin e Pragës.
Dita e shtunë ishte ditë zie kombëtare në gjithë Çekinë. Në Pragë, flamujt u ulën në gjysmështizë, ndërsa mijëra qytetarë bënë homazhe për viktimat para Universitetit.
